Tamatumunnga pissutaavoq kalaallit kilisaataatillit arlallit kattullutik kommunip umiarsualiveqarfiani qerititsivissualiornissamik pilersaaruteqartut talittarfiup pisiarinissaanik saaffiginnissuteqarnikuunerat.
Pilersitsiniartut anguniarpaat raajat aalisakkallu Qallunaat Nunaannut nassiuteqqaartarnerat atorunnaarlugu toqqaannartumik pisisunut Sisimiuniit nassiunneqartalernissaat.
Suliniut aningaasarsiornikkut annertuumik kommunitsinnut iluaqutaanissaa takusinnaagatsigu soorunami piviusunngortinneqarnissaa kommunalbestyrelsemiit tamakkiisumik tapersersorparput.
Pissutigalugu suliniutip piviusunngortinneqarneratigut suliffissat nutaat pilersinneqassammata aammalu kilisaatit akulikinnerusumik Sisimiunut usingiariariartortalernerisisigut kommunip sulisut akileraarutaasigut isertittagai amerlissammata. Taassumalu saniatigut kilisaatinik kiffartuussinermik suliaqartut assigiinngitsut aamma suliaqarnerulernerannik malitseqassaaq. Taamaattumik suliniut piviusunngorpat umiarsualiveqarfitta pisoqarfiunerulerneranik pinngitsoorani pitsaasumik kinguneqassaaq.
Erseqqissaatigissavarpullu umiarsualiviup sananeqarnerani aningaasartuutaasimasut amerlanerpaat utertinneqarnissaat anguniarlutigu, umiarsualiviup minnerpaamik 50mio.kr.-nik akilerlugu pisiariumaneqarpat aatsaat tunisinnaallutigu isumaqatigiissutigigatsigu. Ilanngullugulu erseqqissaatigissavarput umiarsualivik kommunimiit pigineqaraluaruniluunniit Inatsisit malillugit toqqaannaartumik kommunip karsianut aningaasarsiutigineqaqqusaanngimmat, taamaallaallu aserfallatsaaliinermut matussutissanik akiliuteqartitsisinnaalluni.
Malitassagullu malillugit kommunip pigisai tamanut ammasumik tuniniarneqartussaapput, tuninissaalu iluatsissappat aningaasat isertinneqartut suliniutinut allanut soorunami atorneqasinnaanngussapput.
All. Malik Berthelsen, Borgmesteri
