Namminersulernissaq eqqartugaaleqisoq assorsuaq takorloorumanaattarpoq illoqarfissuup avataaniituulluni. Siunissamummi qanoq eqqarsaataavugut? Uagut illoqarfissuarmi nutsernikuungitsugut, pisariaqartipparput nunarput tamaat isiginiarneqarnerulernissaa. Piffiit assigiinngitsut, assigiinngitsunik piorsarlugillu pilersitserusuttunik sinaakkusersuisussanik amigaateqarpugut. Uagut Kangerlussuarmi mittarfissuaqareerlutalu avatangiiseqareerpugut kusanarluinnartumik. Eqqarput tunniussassarpassuaqarpoq piorsarsinnaasatsinnik. Piorsaaffigereernikuusagullu timmisartorsuup mittarunnaarneranik uneriataaginnarnikut, suli pigaagut.
Suliffippassuit ukiuni arlalinni piiaarusaarnikuuneri kangerlussuarmut assut sunniuteqarnikuullutillu sunniuteqarput. DMI, Naviair, Tusass allakkerivia, A/S Ini, minnerunngitsumillu Air Greenland-imi sulisorpassuit nutserneqarnikuupput. Minnerusumik annerusumilluuniit pinngatsaalisamik. Suliffeqarfippassuit eqqarsaatigalugit , inuerusaaneq?
Nunatta aqutsisui, akueriuminaappoq suliffeqarfippassuit piiarnerini akuersaaruminaappoq, nutaanik suliffiusinnaasunik pilersitsinissassinnut inerisaasinnaanissassinnut eqqarsarsimannginnersi. Nunamik, piffimmik taamak ineriartortinnissaanut periarfissaqartigisumik qularutigaara nunarput peqartoq, kangerlussuartut ittumik. Kaamattuutigerusupparput, inerisaanissaq iluaqutissanngorlugu nunaqartuusunut suliniutigineqassasoq.
Kangerlussuup mittarfia, nunarput kiisalu Kangerlussuaq pillugu, atorluarneqarli. Kangerlussuaq massakkut inissisimavoq ukiup affaanaanik Danmarkimut angallassiffiussalluni. Uagullu piorsaaqataasagutta nunagisatsinni, ukiup affaanaanik inuusutaasinnaasunik ingerlatsinissarput killeqartorujussuuvoq. Kikkummi ukiup affaanaanik inuusutissarsiorsinnaagamik? Timmisartuussineq nunatsinni allanngormalli assorsuaq takornarianut minnerunngitsumillu tammajuitsussanik piniariartitsisartut eqqugaapput. Ullut arlerlugit kinguaatoortarnerit, sungiusimanngisagut, Nuuk silaa ajoraangat nunarput tamaat eqquingaatiartalernera suliffeqarfippassuarnik eqquivoq.Qallunaat nunaaniit timmisartoq tikinniartarnera kiisalu nunatta iluani nuumiit aallajaartannginnera pissutigalugu Kangerlussuarmut innarliinera annertoqaaq. Tikittuaanarnissarput kajuminnassusii eqqugaavoq, assut!
Nunatta aqutsisui. Ilissi pissaaneqarpusi allannguisinnaanissamut. Ilissi nunarput tamakkerlugu ineriartortitseqataasinnaavusi. Periarfissitsigut minnerpaamik sap. Ak. ataasiarluni Air Greenland Københavnimiit Kangerlussualiartarnissaa ukioq tamaat. Taamaaliornikkut illoqarfissualiartuungitsut ilaasorisinnaavaat, minnerunngitsumillu piffik nunatsinni immikkuullareqisoq kusanaqisorlu uagut piorsaanissatsinnik sinaakusissavarsi.Takornariaqartitsineq pikkoriffigaarput. Pikkoriffipput atorluarusupparput.
Periarfissitsigut, - piareersimavugut!
Inussiarnersumik inuulluaqqusilluta
Kangerlussuarmi Nunaqarfimmi aqutsisut
Sermitsiaq / AG-mut
Vivi Schultz, Anna-Karen Hoffmann & Stina Steenholdt-Sørensen