Ukiumi atuarfiusoq kingulleq qiimaffiulluni nuannaarfiuvoq atuartunut, angajoqqaanut sulisunullu nalliuttorsiufiusoq. Nalliuttorsiornermi atuartunut pikkorissunut, klassinut aamma angajoqqaanut tunniusimasunut ukioq atuarfiusumut tunniusseqataasunut qujaniartoqarpoq! Ilinniartitaanermut ataatsimiititaliami siulittaasup Evelyn Mølgaardip "Angajoqqaanik akuutitsinerpaamik ukiup klassiannut." akissarsiassaq tunniuppaa. Oqalugiaataa uani atuarsinnaavat:
Qeqqata Kommuniani Ilinniartitaanermut Ataatsimiititaliami siulittaasup Evelyn Mølgaardip ”Angajoqqaanik akuutitsinerpaalluni ukiumi 2024-2025-imi atuarfiusumi klassitsialak” pillugu oqalugiaataa.
Angajoqqaanik akuutitsinerpaalluni ukiumi 2024-2025-imi atuarfiusumi klassitsialak
Asasakka atuartut, ilinniartitsisut, angajoqqaat aammalu maani najuuttusi tamassi.
Ullumikkut ukioq atuarfiusoq kingumut naaginnakaseqaaq, qularinngilara ukioq atuarfiusoq meeqqanit, ilinniartitsisunit angajoqqaanillu ilikkagaqarfiulluarlunilu pissarsiaqarfiulluarsimassasoq.
Angajoqqaat meeqqami atuarfianni ingerlalluarnissaannik kissaassisut, kajumissaarisut, oqaaqqissaarisut ikorfartuisullu peqataatitsilluarlutillu akuutitsilluartut tamaasa qutsavigerusuppagut. Angajoqqaat meeqqami ingerlalluarnissaannik pimoorussisut, pitsaasumik atuarfimmiinnissaannut pilersitseqataasuupput.
Taamaattumik ullumikkut Qeqqata Kommunianiit kajumissaasiilluta nersornaaseerusuppugut, ukioq manna immikkut ittumik maluginiarneqartunik.
Ukioq atuarfiusumi matumani atuarfinnit pingasunit innersuunneqartut arfiniliupput. Taakkunanngalu arfinilinni ataaseq kisiat ilinniartitaanermut ataatsimiitsitaliamit 25.000kr.-inik kajumissaaserneqassaaq.
Angajoqqaanik akuutitsinerpaalluni ukiumi 2024-2025-imi auarfiusumi klassitsialak:
- Klassi eqeersimaartuuvoq, ilaqutaasunit tamanit ataatsimoorfiusoq.
- Timimik aalatitsinermik, pinngortitamillu atuilluarnissamik pingaartitaqartuuvoq.
- Angajoqqaat toqqissisimallutik ilinniartitsisumut eqeersimaartumut naleqartitsillutik ikioqatigiinneq ukkatarisarpaat.
- Qaammatit tamaasa, ilaanni qaammammut pingasoriarlutik atuarfimmi ilaqutariissuartut nereqatigiittarput.
- Meeqqat, angajoqqaat, aanaakkut aataakkullu ataqatigiilluarlutik ataatsimoorfigisuuaat.
- Angajoqqaat paarlakaajaallutik, nammineq piumassuseq aallaavigalugu sapaatit akunneri tamaasa kaaginik nerisassanillu assigiinngitsunik tuniniagassaannik pilersaarusioqatigiinnermikkut nassartitsisarput.
Angajoqqaanik akuutitsinerpaalluni ukiumi 2024-2025-imi atuarfiusumi klassitsialak maani Nalunnguarfiup Atuarfianeersuuvoq tassaalluni 6.D!