Najuuttusi tamassi tikilluakutsooritsi!
Immikkullu aamma tikilluaqqorusuppara Attaveqaasersuutinut Naalakkersuisoq, Aqqaluaq B. Egede, Aqqaluaq tikilluarit, soqutiginnillutit peqataanerit nuannaarutigaarput.
Oqartariaqarpugut kiisami!
Tassami una suliaq annertooq, uagut sioqqullutali kommunalbestyrelseusimasut, Tassa Hermannikkut(borgmesteriusimasoq Hermann Berthelsen), suleqataasalu aallartisarsimasaat ukiuni arlalissuarni ingerlanneqareerluni kiisami ullumikkut atoqqaartissinnaanngorparput, tamannalu pillugu innuttaasut tamassi pilluaritsi!
Kommunimilu atrfilittagut ukiuni taakkunani piviusunngortinniarlugu ilungersoqataasimasut tamaasa, minnerunngitsumik suliniutinut pisortaq Laust Løgstrup, nukipparujussuit, piffissarujussuarlu atorlugu aammalu Kangerlussuup Sisimullu akornganni arlaleriarujussuarluni pisummik, qimussimik, cykel-erlunilu aqqusinissap iluatsinnissaanut ilungersuutiginnissimaneranut kommunimiit qutsavingingaarparput, Lausti tunniusimalluinnarlutit ilungersorninnut qujanarsuaq!
Neriuppunga aqqusineq siunissami ineriartortinneqarsimalluni atorluarneqalerpat, tamatuma aallartisarneqarnissaata qanoq ilungersunarsimatiginera ajornak utoqqasaanngoruit nuannersumik kingumut eqqaasarumaarit.
Aammalu Avatangiisinut Naalakkersuisuusimasoq Kalistat Lund, periarfissat upperalugit ineriartortsitserusunnitsinnillu tapersersorluta, imeqarfik saneqqullugu aqqusinniorsinnaanerput akuersissutigisimammagu annertuumik qutsavigaarput, Kalistat, neriuppunga akuersissuteqarfigisimasavit pingaaruteqassusaa takuniarlugu taamaallutit tamaanga cykerliartorumaartutit.
Soorunami Sisimiut tungaani aqqusinniortoq BJ Entreprise, aammalu Kangerlussuup tungaani suliarinneqataasoq SFJ Entreprenør, uuminnga piumassuseqarlutik suliarinnissimanerannut qutsavigaagut, BJ Entreprise aamma SFJ Entreprenør qujanaq!
Soorunami aamma uagut ineriartornermut peqataarusuppugut!
Qeqqatalu kommuniani innuttaasut qangaaniilli nammineersinnaanertik, nammineersinnaanerpullu sapernagu takutittareerparput!
Nunatsinnilu ineriartornermut peqataassagutta uagut immikkuullarissumik, pissanganartumillu kommunitsinni neqerooruteqartariaqarpugut.
Tassami takornariaqarneq ukiuni makkunani tassaalersimavoq nunatta aningaasarsiorneranut annertuumik pingaarutillit ilagilersimasaat.
Soorlu tamanna ukiuni arlalinni Ilulissani, aasaq mannalu Nuummi annertuumik takuneqarsinnaallunilu malugineqarsinnaasoq.
Uagullu Sisimiut Kangerlussuullu akornganni nunatarujussuarput alutornartoq, isumarput malillugu tassaavoq, timi atorlugu misigisassarsiornissamut ukioq kaajallallugu nunatsinni periarfissaginnerpaasoq!
Tassami aqqusineq nunarsuarmioqatitta aningaasanik akiliillutik misigerusutaannik assigiinngitsorpassuarnik neqeroorutinik periarfissiisussaavoq, soorlu ATV-nik, cykelinik, pisummik, imaluunniit tasersuartigut qajartornernik qissattartitsinermilluunniit misigisassarsiortitsinissamut.
Taamaattumik nunaqqatikka, kaammattorusuppassi illoqarfitta Sisimiut ineriartortinneqarnissaa anguniarlugu periarfissat ammartut atorluarlugit sapiiseqqullusi, soorlumi Nuummi Ilulissanilu taamaasiornermikkut aningaasarsiorlutik ulapputtut.
Sisimiuni pilluarluta inuuneqarnitsinnut pissutaasut ilaat tassaavoq kangiatungitsinni pinngortitarsuarput, qimussimik, qamuteralannik, sisoraaserlutaluunniit aneerfigisartagarput.
Taamaattumik una aqqusineq takornarianuinnaanngitsoq kisianni aamma Sisimiuni innuttaasunut aasami ajornannginnerusumik pinngortitamukarsinnaanissamut annertuumik periarfissiisussaavoq.
Takorluulaarsiarsiummi cykerlusi ATV-lerusiluunniit imaasiallaannarlusi pinngortitamut unnuiartorsinnaalernissi qanoq nuannerunartiginera, soorlu siorna Kangerluarsuk Tullermi naapitama, Sisimiuniit cykerluni eqalunniarsimasup tamanna ajornanngitsoq takutikkaa.
Taamaattumik nunaqqatikka inussiarnersumik kaammattorusuppassi avataaniit tikerarneqarnerulernissarput pilerinarsarlugu Kommunitsinni periarfissagut nuannersut, nuannersumik avammut oqaluttuarisaruumaarisi.
Aap, una aqqusineq illoqarfimmi aqqusinertut inngilaq, Aamma ilisimavarput aqqutaani iluarsaatassartaqartoq, iluarsaanneqarnissaallu aningaasanik immikkoortitsiviginikuuvarput, taamaattumik aqqutaata tamakkiisumik ingerlavigiuminarnerulernissaanut suli naammagittalaartariaqassaagut.
Aqquserngup innuttaasunut nuannersumik misigisaqarfiunissaanik ineriartornermillu pilersitsiviunissaanik kissaallutigu pingasoriarluta hurra-rutigisigu, 1,2,3
