Aalisarneq pillugu inatsit januaarip aallaqqaataani 2025-mi atulersoq naapertorlugu angallatit qamutillu motoorillit inuussutissarsiutigalugu aalisarnermi tulaassisarnernilu atorneqartartut nutaanik piumasaqaatitaqalerput. Akuersissummik januaarip aallaqqaataani 2026-mi pisinnaajunnaartoqassaaq angallatit nalunaarsimatinnagu.
Ilinnut tamanna qanoq kinguneqassava?
Angallatit 6 meterinit mikinerusut:
- Angallatit inuussutissarsiutigalugu aalisarnermi atorneqartartut tamarmik Angallatit nalunaarsuiffiannut Imarsiornermut Aqutsisoqarfiup Qarasaasiakkut nalunaarsuiffiani kingusinnerpaamik decembarip 31-anni 2025-mi nalunaarsorneqareersimassapput.
- Angallatit nalunaarsorneqartussanngortut ilaatigut tassaapput Poca 600 aamma Askeladden JD 600 Qooqa kiisalu angallatit 6 meterinit naannerusut.
- Angallatit tamarmik najugarisap umiarsualiviata ilisarnaatitut normuanik angallatit saneraasigut erseqqissumik nalunaaqqutserneqassapput.
Qamuteralaat ATV-llu
- Qamuteralaat ATV-llu inuussutissarsiutigalugu aalisarnermi atorneqartartut tamarmik politiinit kingusinnerpaamik decembarip 31-anni 2025-mi nalunaarsorneqareersimassapput.
Angallatit ima nalunaarsussavat:
Nalunaarsuineq qarasaasiakkut pissaaq Imarsiornermi Aqutsisoqarfiup nittartagaa aqqutigalugu
Angallatinut nalunaarsuiffimmut paasissutissanik imaattunik nassiussisariaqarnissat naatsorsuutigissavat:
- Pisinissamut isumaqatigiissut, pisiarineranilu uppernarsaatit imaluunniit pisiat allagartaat
- Siusinnerusukkut piginnittuusimasumut uppernarsaatit, angallat atornikutut pisiarineqarsimappat – ukiut qulit sinnerlugit pigereersimanngikkukku
- Angallatip uuttorneqarneranut allagartaq
- Siusinnerusukkut nalunaarsorsimanermut uppernarsaatit
Qamuteralaat ATV-illuunnit pigisatit ima nalunaarsussavatit:
Qamuteralaat ATV-illuunnit pigisatit nalunaarsortinniarukkit politiinut saaffiginnissaatit uku nassarlugit:
- Qamuteralaat ATV-illuunnit nalunaarsortinnerani qamutit isumannaatsuuneri politiinit misissorneqassapput. Politiit qulliit, bremsit aquutillu pingaarnerutillugit misissortarpaat.
- Sillimmasersimanermut uppernarsaat.
- Nalunaarsuiffissaq immersorneqarsimallunilu atsiugaq. Nalunaarsuiffissami piginnittup aqqa sillimmasersimanermut uppernarsaammi piginnittup aqqa assigissavaa.
- Nalunaarsuiffissaq Sullissivik.gl aqqutigalugu pissarsiarisinnaavat
Paasissutissat erseqqinnerusut uani atuarsinnaavatit
OBS: Illoqarfimmi politeeqarfeqanngitsumi najugaqaruit nalunaarsuinissaq nummerpladenillu pissarsinissaq siunertaralugu politeeqarfimmut qaninnermut saaffiginnissinnaavutit.
Oqaatigissallugu pingaarutilik: Ikaarsaariarfimmi januaarip aallaqqaataa 2026 tikillugu suliap nalunaarsorneqarsimanera uppernarsassallugu naammappoq.
Nalunaarsuinerit piffissaq eqqorlugu pisinnaaqqullugit angallatinik qamutinik motoorilinnillu piginnittut nalunaarsuinissamik aallartitseqqullugit Naalakkersuisoqarfimmit kajumissaarutigineqarpoq.
Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl