Suliniut Qanga pisimasunut qivialaarneq Maniitsumi Katersugaasivik suleqatigalugu Maniitsumi eqqaanilu assit sinaakkutaat qulingiluat septembarimiit oktobarip naaneranut saqqummerseqqaneqassapput. Assit sinaakkutai isikkivilerlugit inissitaapput, soorlu siusinnerusukkut – annoraaminermi eqqumiitsuliortumit imaluunniit assiliivik atorlugu assiliisartumit – sinaakkuteqartinneqartut.
Sinaakkutit ataasiakkaatut imaluunniit pisuttuarfissakkut kulturimik oqaluttuartutut misigineqarsinnaapput. Iliuuseqarfigineqarsinnaapput: qimerluualaarsinnaavatit, attorsinnaavatit aamma assilisinnaavatit, innersuussutigissavarpulli ikkussukkanut qallussanngitsutit. Akerlianik illoqarfik nunallu ilaa bileqanngitsoq, aqqusineqanngitsoq illoqanngitsorluunniit takorlooriaruk – imaluunniit maanna pisumiitillutit imminut assilisinnaavutit ikinngunnullu siammarterillutit. Ima allakkusukkuit hashtag #udsigttilfortiden.
Sinaakkutit qulingiluaasut atorlugit qanga pisimasut maannalu pisut uummaarissumik iliuuseqarfigineqartutullu takorluugaapput. Atuagaq qupperarnagu illoqarfilli angalaarlugu isikkiviit misigisassarsiorfigissagitit kajumissaarpatsigit. Sinaakkutini QR-kodit atorlugit assit oqaluttuarisaanermi pisimasut takusinnaavatit.
Isikkivinni qanga pisimasunut qivialaarnikkut ullut tamaasa sanioqquttakkavut qanga aamma allanit aqqutigineqartarsimasut eqqaasissavaatigut. Nunarsuaq ukiut 50-it – quliinnaalluunniit – matuma siorna allatorujussuaq isikkoqarpoq. Imaluunniit taamaappa? Apeqqut taanna allallu apeqqutit sinaakkutitigut, assit oqaluttuarisaanikkut pingaarutilikkut oqaluttuallu attuumassuteqartut misissuataarsinnaavatit.
Suliniut pillugu paasissutissat allat atuarsinnaavatit Maniitsumilu isikkiviit qulingiluat toqqarneqartut sumiinneri nunap assingatigut takusinnaavatit uani www.frydnrejn.dk. Saqqummersitaq Sisimiuni Nanortalimmilu takutinneqareerput, aamma saqqummersitaq Maniitsumi naammassineqarpat saqqummersitat Paamiunut ingerlateqqinneqassapput.
Suliniut Qeqqata Kommunianit, Nuna Fondenimit, Aningaasaateqarfik Sermermit, Nordisk Kulturfondimit aamma Eqqumiitsuliornermut Aningaasaateqarfimmit tapersersorneqarpoq.