2026-mut ukiunilu tulliuttuni missingersuutit akuersissutigineqarput

Ukiuni makkunani ilaatigut sanaartornikkut ingerlalluartoqarnera sulisisnnaasullu amerlanerpaat sulinerat pissutigalugu innuttaasut akileraarutaat 2026-mi 50.mio. kr.-nik annertunerunissaat naatsoruutigineqarpoq.

Qujanartumillu akit akissarsiallu qaffakkiartornerinut Naalakkersuisut Ataatsimoortumik tapiissutit aqqutigalugit akileeqataannginnissaminnik oqariartuutigisimasarluartik allanngortillugu 2026-mi 8.2mio. kr.-inik akileeqataaniarlutik aalajangerput.

Akileraarutitigut isertitagissaarneq pissutigalugu suliniutinut sanaartugassanullu nutaanut ukiuni tulliuttuni sisamani 156.6mio.kr. immikkoortinneqarput. Ilaatigullu makkua aningaasaliiffigineqarput; nutaanik inissialiornissaq, innarluutilinnut ataatsimoorussamik najugaqarfiliornissaq, Maniitsumi Utoqqaat angerlarsimaffiata aserfallatsaalineqarnissaa aammalu naluttarfiliornissamut aningaasaliissutit 30.mio.kr.-inik ilaneqarnissaat.

Angajoqqaanillu nukittorsaanissat anguniarlugit meeqqerivinni angajoqqaanik perosaaarnerup tungaasigut siunnersuillutik oqaloqatiginnittartussanik aammalu ilaqutariinnik kiffartuussivimmi atorfiit amerlineqarnissaat ilanngullugit aningaasaliivigineqarput.

Meeqqerivinnut, eqqaaveqarnermut anartarfinnullu akigititat 2026-mi allannguuteqassanngillat, akileraarullu 26%-miittoq taamaaginnassalluni.

Tamanna pillugu borgmesteri Malik Berthelsen, imatut oqarpoq, “ sulisinnaasut amerlanerpaat sulinerat nuannaarutigalugulu qujamasuutigaara. Pissutigalugu taakkuummata aningaasaqarnikkut pitsaasumik inissisimanitsinnut pissutaasut aammalu atugarissaarnissatsinnut aningaasalersuisut.” Missingersuutillu pillugit borgmesteri imatut ilassuteqarpoq, ”Iluarisimaarpara missingersuutit partiinit tamanit akuerineqarmata, isumaqarpungalu aningaasaliiffigisagut innuttaasunut pitsaasumik ingerlatsinermilu aningaasartuutikillisaanissamik sunniuteqarumaartut”.

Annertunerusumik paasisaqarusukkuit attavigiuk

Malik Berthelsen
Borgmesteri
Qeqqata Kommunia