Aasivissuit – Nipisanut juullimut tunissut tulluunnartoq

Nunarsuarmioqatigiinnut kingornussassaqarfimmik Aasivissuit - Nipisat ingerlatsineq immikkoortuata tullissaanut maannakkut ingerlaqqissinnaanngorpoq. Augustinus Fonden, Aage V. Jensen Fonde aamma 15. Juni Fonden tamarmiullutik katillugit 16,5 million koruuninik tapiissuteqarput, tamannalu isumaqarpoq, suliniutip immikkoortuata tulliaanut aningaasaliinissaq tamarmiusoq maannakkut inissittoq.

Aningaasaateqarfiit aammattaaq suliniutip immikkoortuanut siullermut tapiissuteqarnikuupput, tamatumani nunarsuarmi kingornussassaqarfiup illersornissaanut ingerlatsiffigineqarnissaanullu suliniutit arlallit naammassineqarlutik. Maannakkut taperseeqqimmata - aammalu ilutigitillugu suleqatigiinnermik nukittunerulersitsimmata - Qeqqata Kommniani sulinermut suliniutillu sammivianut tatiginninnernut sakkortuumik oqariartuutitut isigineqassaaq.

– Aasivissuit – Nipisat nunap assingani immikkoortortaannaanngilaq. Uagununa oqaluttuarisaanerput, pinngortitarput inooriaaserpullu. Tapiissutit 16,5 million koruuniusut suliap ingerlateqqinnissaanut periarfissiipput aammalu nunarsuarmi kingornussassaqarfik paarineqarnissaa aammalu ingerlanneqarnissaa, ulluinnarni inunnut isumalimmik tunniussinissaata qulakkiissavaa, taamak ooqarpoq Qeqqata Kommuniani borgmesteri Malik Berthelsen.

Nunarsuarmi kingornussassaqarfik ulluinnarnut qanittoq
Ingerlatsinissamik suliniutip immikkoortuata aappaa ingammik meqqanut inuusuttunullu, sumiiffimmi inuiaqatigiinnut aammalu immikkoortumi inunnut angallattunut kultoorerput malillugu inooriaasitsinnik nunarsuarmi kingornussassaqarfiup paasinarnerulernissaa qanilaarnerunissaalu ukkatarineqassaaq. Ilaatigut sinerissamiit nunap timaanut inuuneq pillugu oqaluttuat, piniartarneq, pinngortitaq aamma ileqqut aammalu kulturi pinngortitarlu Nunatsinni imminut avissaartinneqarsinnaanatik qanoq imminnut atanerannik oqaluttuat pineqarput.

Aasivissuit – Nipisat site manager, Paninnguaq Fleischer-Lyberth, aningaasaateqarfiit aalajangiineri nuannaarutiginngaarpai:
– Tapersersoqqinniarluta aningaasaateqarfiit toqqarsimammassuk nuannaartorujussuullutalu qujamasuttorujussuuvugut. Suliamut tamarmiusumut inunnullu tamanut immikkoortumi siullermi peqataanikuusunut nersualaarinninneruvoq.

Taassuma naqissuserpaa, tapersiissut sulinermi qanoq isumaqarnersoq:
– 16,5 million koruunit inuit nalinginnaasut ulluinnarmi, atuarfinni, katersugaasivimmi, sumiiffinni inuiaqatigiinni nunallu timaani nunaqartunut tikeraanullu illuaraliornikkut malugisinnaasaannik suliniutinik tigussaasunik aallartitsisinnaanngortippaatigut. Ataatsimoorluta oqaluttuarisaanitsinnut aammalu nunarsuarmi kingornussassaqarfik uummaarissunngortinnera, ungasiaaniit paariinnagaanani, pineqarpoq.

Siunissamut ataatsimoorussamik akisussaaffiusoq
Tapiissutinik ingerlatsinissamik suliniut ima sukkatigisumik ingerlaqqissinnaassaaq, suliat ajunngitsumik suliarinissaanut piffissaqassalluni aammalu inunnut, pinngortitamut kulturimillu ataqqinnilluni. Qeqqata Kommunia aningaasaateqarfinnik, sumiiffinni inuiaqatigiinnik suleqatigisanillu suleqateqarnerup ingerlaqqinnissaanut qilanaarpoq, taamaalilluni Aasivissuit - Nipisat aamma siunissami uummaarissumik nunarsuarmi kingornussassaqarfiuginnarsinnaammat amerlasuut piginneqataaffigisutut misigisaqarfigisaat.

- Aningaasaateqarfinniit suleqatigineqarnissatsinnut tatigineqarnerput tapersersorneqarnerpullu innuttaasut sinnerlugit qujamasuutigaara. Isumaqarpungalu Aasivissuit – Nipisat ingerlanneqarnerani sulisutta taakkualu qanimut suleqataasa pitsaasumik sulinerisigut aatsaat tamanna anguneqartoq. Taamaattumik sulisugut suleqataallu sulilluarsimaneri pissutigalugit nersualaarlugillu qujaffigerujussuarpakka, borgmester Malik Berthelsen naggasiivoq.


Aasivissuit – Nipisat piniarfiuvoq immikkullarissoq ukiuni tusindilikkaani inuit, pinngortitap piniagassallu imminnut sunniivigeqatigiinnerannik ersisitsisoq. (Assi 1. Jens Fog Jensen. Assi 2. Lisa Germany, DAC.)

Annertunerusumik paasisaqarusukkuit attavigiuk

Paninnguaq Fleischer-Lyberth
Site manager, Aasivissuit - Nipisat
Qeqqata Kommunia
Mobil: (+299) 56 28 10