Politiillu ukiumoortumik nalunaarutaanni takuneqarsinnaavoq pinerluttulerinermik inatsimmik nalunaarutiginninnerit 2025-mi 26%-mik amerleriarsimasut, tamannalu annertuvoq, alianarlunilu. Taamaattumik Sisimiuni politiit suliaminnut angummassinnaassappata amerlineqartariaqarnerannik Inatsisit atuutsinneqarnerinut Naalakkersuisumit piumasarineqarsimanera isumaqatigaarput.
Sisimiuni politiit pitsaasumik qanimut suleqatigivagut. Ilisimavarpullu ilungersorlutik sulisut aamma Naalakkersuisutuulli isumaqarpugut annertuumik nersualaagassaasut. Pinerluttulerinermilli nalunaarutiginnittarnerit, soorlu tillinniaqattaarnerit persuttaasarnerillu sukkanerusumik akiorneqassappata Sisimiuni politiit amerlanerusut pisariaqartippagut, taamaattumik amerlineqarnissaat nukingernarpoq.
Ilanngaaserisut aamma pisariaqartippagut
Qeqqata kommuniani ikiaroornartup arsaarinnissutigineqartartup “annikippallaarnera” pissutigalugu ikiaroornartup kommunitsinni ajornartorsiutaannginneranik Naalakkersuisut isumaqarsimappata, isumaqarpugut Naalakkersuisut eqqarsaqqittariaqartut. Takuuk Naalakkersuisut §37-mi akissutaat 150/2025.
Tassami imaanngilaq hash 2025-mi arsaarinnissutigineqartoq Maniitsumi taamaallaat 256 graminik Sisimiunilu 5.6 kg.-nik annertussuseqarmata taava kommunerput ikiaroornartoqanngitsoq. Kommunitsinni arsaarinnissutigineqartartup taamak annikitsigineranut uagut pissutaasoraarput aalajangersimasumik qimmilimmik ilanngaaserisoqannginnerput. Taamaattumik nunatsinni ikiaroornartumut akuersaannginnerput takutinniarutsigu illoqarfiit aamma nunatta avataaniit timmisartumik tikinneqarneq ajortut ilanngullugit ilanngaaserisoqarnikkut annertusaavigisariaqartut isumaqarpugut. Pissutigalugu siusinnerusukkut pisartut takutitttareermassuk arsaarinnissutigineqartut annertuut umiarsuit imaluunniit angallatit atorlugit eqquteriarneqartartut, taamaattumik umiarsualiviit aamma ilanngullugit nakkutigineqarneri annertusartariaqartut isumaqarpugut.
Sisimiuni innuttaasunut kaammaattuut
Nalinginnaasumik Sisimiuni toqqissilluta namminerlu kajumissutsimik sulisoqarnikkut nukittuffigalugu inuuvugut. Taamaattumik illoqarfitta nuannersumik tusaamaneqarnissaa anguniarutsigu meerartatta inuusuttattalu ileqqorissaarnissaat tamattalu inoqatitsinnut ataqqinninnissarput angerlarsimaffitsinni pingaartinnerusariaqaripput ilungersortumik kaammattuutigerusupparput.
Isumaqarpugullu Savalimmiuni inuunermi qaloq ileqqoqarnerat nunatsinniit isumassarsiorfigineqarsinnaasut. Tassami Savalimmiuni pinerluttulerinermi inatsimmik nalunaarutiginninnerit innuttaasut 1000-iugaangata taamaallaat 16,6-imik annertuusueqartut, nunatsinni 70,5-imik annertussuseqarput.
Malik Berthelsen, borgmesteri Evelyn Mølgård, Siumut Juliane Enoksen, IA
Erne Olsen, Demokraatit Steffen Johansen, Naleraq
Annertunerusumik paasisaqarusukkuit attavigiuk
Malik Berthelsen
Borgmesteri
Qeqqata Kommunia
Mobil: (+299) 86 73 00