Qeqqata Kommunia Kalaallit Nunaannilu Timersortartut Kattuffiata akornanni Takorluukkatut Isumaqatigiissutip sivitsornera

2021-mi Qeqqata Kommunia aamma Kalaallit Nunaanni Timersortartut Kattuffiat isumaqatigiissuteqarput, meeqqanut inuusuttunullu ataatsimooqatigiinnermik peqqinnartumik akuutitsisumillu nukittorsaanissaq siunertaralugu; peqatigiiffilerisut akornanni, atuarfimmi aammalu pinngortitami.

Isumaqatigiissut anguniakkanik itinerusunik ukkaqarfiusunik pingasunik peqarnikuuvoq:
1. Sunngiffimmi aalaneruneq aamma atuarfik akuutitsisoq
- Peqatigiiffinnik, suliffeqarfinnik sumiiffigisamilu suliaqartunik suleqatigiinnikkut atuarfiup sunngiffiullu akornanni ataqatigiinnermik pilersitsineq
- Nammineq kajumissutsimik sulinerup nukittorsarnissaa aammalu sunngiffimmi immikkoortortamik ataqatigiissaakkamik pilersitsineq
2. Timersornermik inuuneq toqqissisimanartoq akuutitsisorlu
- Meeqqanik inuusuttunillu oqaloqateqarluni sunngiffimmi neqeroorutinik ineriartortitsineq timersornikkullu avatangiisinik akuutitsisunik pilersitsineq.
- Meeqqat inuusuttullu sunngiffimi sammisani aaqqissuussani akuusarnerisa qaffassarnissaat
3. Kinguaariit akimorlugit ataatsimoorneq
- Ataatsimoornermik inuulluataarnermillu nukittorsaataasunik sammisanik ilaqutariinnut pitsaasunik pilersitsineq
-
Isumaqatigiissutip ilarivaa avitamik suliniutinut siunnersortimut atorfimmik pilersitsinissaq, takorluukkatut isumaqatigiissummik piviusunngortitsisussamik, tamannalu sumiiffimmi eqiterutsitsinermik aammalu GIF kommunillu akornanni attaveqarnermik pilersitsiffiuvoq.

Qeqqata Kommuniani kommunalbestyrelsi 2025-mi aaliangerpoq takorluukkatut isumaqatigiissut sivitsorneqassasoq, arlalitsigut pitsaasumik sunniutilittut angusaqarfiusutullu nalilerneqarnera tunngavigalugu, ilaatigut eqqaaneqarsinnaavoq aalaneq ilinniartitsinermi periutsitut atuarfimmi ilanngunneqarnera. Isumaqatigiissutip sivitsorneqarnerani suliniutinut ingerlateqqinneqassapput, tulliuttut qulakkeerniarlugit:

- Suliniutinik tigussaasunik ineriartortitsineq
- Najukkami ataatsimoorussat nukittorsassallugit
- Illoqarfinni nunaqarfinnilu timersorsinnaanermut periarfissaqarluarneq
- Ilisimasanik avitseqateqarneq, ataqatigiissaarineq nutaaliornerlu
- Innarluutillit timersornerat ilaatinnerallu nukittorsarlugu

Aammattaaq takorluukkatut isumaqatigiissutip 2026-mit 2028-mut atuuttussap, sivitsorneqarnerani tulliuttut ukkataqarfigineqassapput:
1. Atuarfimmi aalaneq
2. Kajumissutsimik ikiuunneq
3. Atortorissaarutit najukkanilu ineriartortitsineq
4. Innarluutillit timersornerat

Borgmester Malik Berthelsen oqaaseqarpoq:
”Takorluukkatut isumaqatigiissummi angusat pitsaasut assut nuannaarutigaagut, suleqatigiinnerullu ingerlateqqinnissaa qilanaaralugu, meeqqat inuusuttuaqqallu amerlanerit ataatsimoorfiusunut anginernut peqataalernissaanik periarfissiinerussammat.

Sapaatip akunneri kingulliit Sisimiut arlalinnik pisoqarfiunerata takutippaa innuttaasut suliniutit annertuut kivissinnaagaat, ataatsimoorlutik. Tamanna kommunimi illoqarfinnut nunaqarfinnullu tamanut siaruaannissaa kissaatigaarput”.

Takorluukkatut isumaqatigiissut sivitsorlugu tallimanngorneq 10. april Borgmesteri Malik Berthelsen aamma Timersoqatigiit Kattuffiani Siulittaasoq Claus Nielsen persuarsiorfiunngitsumik Sisimiuni atsioqatigiipput.

"Suleqatigiinnissamik isumaqatigiissutip sivitsorneqarneratigut ataatsimoorluta timersortarfiit ineriartortinnissaat, kajumissutsimik suliniuteqarnerup tapersersornissaa, meeqqat, inuusuttut inersimasullu amerlanerusut ulluinnarni timersornermut periarfissaqalernissaat aallutissuagut. Sisimiuni Maniitsumilu suliniutit qanoq iluatsissimanersut takusinnaavagut amerlanerusunillu soqutiginnilersitsisimapput – ineriartornerlu tamanna ukiuni aggersuni nangeqqissavarput.

Qeqqata Kommunia qutsavigaara timersornermik ataatsimoornikkullu pingaartitsilluinnarmat. Suleqatigiilluta kommunimi suli annerusumik aalaneq, nuannaarneq ataatsimoornerillu nukittuut pilersissavagut.” Claus Nielsen, Timersoqatigiit Kattuffianni siulittaasoq oqarpoq.



Annertunerusumik paasisaqarusukkuit attavigiuk

Malik Berthelsen
Borgmesteri
Qeqqata Kommunia
Mobil: (+299) 86 73 00