Nunaminertat qinnutigineqarsinnaasut

Kommunip pilersaarusiorfigineqarneranut tapiliussaq nr. 61-imi aalajangersakkat malillugit sanaartorfissat umiarsualivimmi inuussutissarsiornermut sanaartorfissaapput, takuuk nunap assingani ilanngussami sanaartorfissat 1.1 aamma 1.2.

Immikkuualuttup ilaani 700-B6.1-imi sanaartorfissat marluk 600 m² -isut atsigisut nassiussalerinermut, aalisakkerinermut umiarsualivimmullu attuumassuteqartunut siunertanut assingusunut marlunnik quleriiaalerlugu sanaartorneqarsinnaapput.

Sanaartorfissagissaanernik suliaqarnissat sanaartukkanut ataasiakkaanut sanaartortitsisup pisussaaffigissavaa.

Nutaamik sanaartornerit innaallagissamut, imermut kiisalu kuuffissuarmut pilersorneqassapput, eqqagassalerinermut ileqqoreqqusanullu atuuttunut eqqagassalerinermut attavilerneqassallutik. Nutaamik sanaartornerit Qeqqata Kommunianut 2012-imiit 2024-p tungaanut kommunip pilersaarusiorfigineqarneranut kommunip pilersaarusiorfigineqarnerani tapiliussaq nr. 61-imi aalajangersakkat allat takuneqarsinnaapput.

Nunap assingani ilanngussami sanaartorfissat inissisimaffii takuneqarsinnaapput. Qeqqata Kommunianut 2012-imiit 2024-p tungaanut kommunip pilersaarusiorfigineqarneranut kommunip pilersaarusiorfigineqarnerani tapiliussaq nr. 61-imi immikkoortup 700-B6-imi aalajangersakkat atuupput. Kommunip pilersaarusiorfigineqarnerani tapiliussaq, nunap assingi il. il. kiisalu qinnuteqarnermi malitassaq ugguuna takuneqarsinnaapput www.qeqqata.gl aamma http://pilersaarut.qeqqata.gl/

Sanaartorfissat saqqummiunneqartut ulloq 09.02.2024 tunniunneqarsinnaanissaat naatsorsuutigineqarpoq.

Qinnuteqartut uku eqqumaffigissavaat:

• Kinaluunniit inatsisitigut pisinnaatitaasoq, inuit ataasiakkaat, suliffeqarfik, ingerlatseqatigiiffik imaluunniit peqatigiiffik nunaminertamik atugassinneqarnissamik qinnuteqarsinnaapput, ilaquttatut qanigisap arlalinnik qinnuteqaateqarsinnaannginnera eqqumaffigiuk.
• Makitsinermi qinnuteqarsinnaatitaasut tamarmik makitsinissamut ataatsimik peqartarnerat tunngaviusarpoq. Taamaalillunilu katissimallugu aapparisaq, inuk inoqutigiinneersoq, inuit allat qinnuteqaammut tunngatillugu imaluunniit toqqaannartumik attuumassuteqartut – ataatsimoorussamik soqutigisaqaqateqartut, imaluunniit ingerlatseqatigiiffinnut inunnullu ingerlatseqatigiiffimmiittunut – tamakkiisumik ilaannakortumilluunniit piginnittutut, ingerlatseqatigiiffiup aqunneqarneranut ilaasut imaluunniit ingerlatseqatigiiffimmut taassumaluunniit aqunneqarneranut qanimut attuumassuteqartut nunaminertanut qinnuteqarfiusimasumut qinnuteqarsinnaanngillat. Aamma suliffeqarfissuarnut tamanna atuuppoq. Assersuutigalugu aappariinnut marluusunut, imaluunniit ingerlatseqatigiiffimmut taassumalu pisortaaneranut imaluunniit ingerlatseqatigiiffinnut marlunnut ataatsimik pingaarnertut aningaasaliisulinnut il.il. immikkut qinnuteqarnissat inerteqqutaavoq.

Qinnuteqaateqarfissap qaangiunnerani qinnuteqaat ammarneqarpat, tassani malittarisassat eqqortumik malinneqarsinnaanersut nalilerneqassaaq. Eqqortumik malinneqarsimannginnera paasineqarpat, qinnuteqartoq malittarisassanik unioqqutitsisoq peqataajunnaarsinneqassaaq.

Nunaminertamik inniminniinermut qinnuteqaammi ilanngunneqassapput:

• Sanaartornissamut piviusorsiortumik piffissamik pilersaarusiorneq, nunaminertamik atuinissamut inniminniinermut nunaminertamillu atugassinneqarnermut, matumani sanaartugassap qaqugukkut aallartinneqarnissaa piffissaritinneqartunik atuuttunik malinnittumik aammalu naammassineqarnissaata naatsorsuutigineqarneranut paasissutissat ilanngullugit.
• Pilersaarutip allaaserinera, suut sanaartorneqarusunnersut aammalu siunertaq allaaseralugu aamma/imaluunniit titartagartaa ilanngullugu.
• Aningaasaliisinnaassuseqarnermik uppernarsaat. Qinnuteqartup sanaartugassatut qinnuteqaatip piviusunngortinnissaanut aningaasatigut periarfissani uppernarsassavai. Aningaaseriviup imaluunniit aningaaseriviup allap naliliinera naapertorlugu qinnuteqartup qinnuteqarnerata nalaani aningaasaqarneranik sukumiisumik nalilersorneqarsimasoq – pisariaqanngitsumik unitsinneqarani – nunaminertami qinnutigineqartumi sanaartornissap piviusunngortinneqarnissaanut periarfissaqartoq aningaaserivik, imaluunniit aningaaserivik alla uppernarsaassaaq. Uppernarsaanermi qinnuteqartup ukiuni arlalinni atorunnaarsinneqarsinnaanngitsumik attartortitsisuunini pillugu aalajaatsumik attartortoqarnera imaluunniit pissutsit tassunga assingusut apeqqutaatinneqassanngillat. Sanaartugassap aningaasalerneqarnissaanut qinnuteqartup nammineq aningaasaqarnera naapertuutissaaq. Uppernarsaatip tutsuiginassusia eqqarsaatigalugu akiliisinnaassuseqarnermi piumasaqaatit nalinginnaasut naapertorlugit aningaaserivik naliliisussaatitaammat – aningaaserivik imaluunniit aningaaserivik alla uppernarsaanermini inatsisitigut taamatut pisussaaffeqannginneraasinnaanngilaq.

Qinnuteqaatit taakkuninnga paasissutissanik uppernarsaatinillu imaqartut kisimik akuerineqartussatut ilanngunneqassapput. Qinnuteqaatip tamakkiisuunissaa eqqortumillu paasissutissiinissaq qinnuteqartup akisussaaffigaa. Qinnuteqarfissatut piffissaritinneqartoq qaangiutsinnagu qinnuteqaatit kommunip misissorneq ajorpai.

Paasissutissanut, uppernarsaatinut qinnuteqarnerulluunniit ingerlanneqartarneranut nalorniguit, paasissutissanilluunniit pisariaqartitsiguit Teknikkimut Avatangiisinullu immikkoortortaqarfimmut Maniitsumiittumut saaffiginnissinnaavutit.

Qinnuteqaatit 2024-mi pingasunngorneq januaarip 31-ani nal. 14⁰⁰ tiguneqarsimasut piffissaq eqqorlugu tiguneqarsimasutut isigineqassapput.

Atugassiinerup ingerlanneqartanera

Qinnuteqaatit piffissaq eqqorlugu tiguneqartut tamarmik ataatsikkut tiguneqartutut isigineqassapput. Sanaartorfissanut ataasiakkaanut qinnuteqartut piukkunnartut arlaliussagaluarpata, agguataarineq makitsinikkut aalajangerneqassaaq. Makitsinissaq sumi qaqugulu ingerlanneqassanersoq qinnuteqartut nalunaarfigineqassapput, makitsineq tamanut ammasuussaaq.

Qinnuteqarnermut piffissap qaangernerata kingorna sapinngisamik sukkanerpaamik agguataarineq makitsisinnaanerlu ingerlanneqassapput, tamatuma kingorna nunaminertamik inniminniinermik pigisaqartoq sivisunerpaamik qaammatini pingasuni nunaminertamik atugassinneqarnissamut qinnuteqaammut inniminniinissamut anngussinnaavoq.

Qeqqata Kommuniani nunaminertamik atugassinneqarnermut aalajangersakkat nalinginnaasut aamma innersuussutigineqarput, http://pilersaarut.qeqqata.gl

Paasissutissat annertunerusut Teknikkimut Avatangiisunullu immikkoortortaqarfimmut piniarneqarsinnaapput, man.otm@qeqqata.gl

Nunaminertamik inniminniinissaq pillugu qinnuteqaat Qeqqata Kommunianut, Teknikkimut Avatangiisinullu immikkoortortaqarfik, Postboks 100, 3912 Maniitsoq imaluunniit qarasaasiatigut man.otm@qeqqata.gl -imut tunniunneqassaaq.