Aalborg-imi paasisassarsiorluni angalaneq

Qeqqata Kommunia DanFish 2009-mi nittarsaassinermi ulluisa pingajuanni kingulliannilu peqataanera ingerlaqqippoq. Ulloq taanna aamma Aalborg-imi paasisassarsiorluni angalanermut atorneqarpoq, tamatumani tallimanngornerup ullaavani politikerit Aalborg-imi meeqqerivik Ridefogedvej pulaarpaat, meeqqeriviup suliniutaa Fri for Mobberi (Qinngasaarisoqarani) ilikkagaqarfiginiarlugu. 

Fri for Mobberi (Qinngasaarisoqarani) suliniutaavoq Kungikkormiusut ataqqinassusillip Kronprinsesse Mary-p suliniuteqarneratigut Red Barnet aamma Mary Fonden-imit ineriartortinneqartoq, meeqqerivimmiilernermiilli qinngasaarneqartarnermut ajornartorsiutinik sammisaqartoq.  Meeqqerivimminni qinngasaarisarnerup pinaveersimatinnissaanut perorsaasut atorsinnaasaannik inuttut sakkussanik arlalinnik suliniummut ineriartortitsisoqarnikuuvoq. Kommmunimi Fri for Mobberi (Qinngasaarisoqarani) ineriartortinneqarnissaanut Qeqqata Kommunia Red Barnet-imik isumaqatigiissuteqaqqammermat, Ridefogedvej-imi meeqqerivimmi suliniut nammineq takunissaanut kommunimilu suliniummik ineriartortitsinissamut isumassanik katersuiffissatut periarfissaasimavoq pitsaasoq. 

Meeqqerivimmi pulaareernerup kingorna Aalborg-ip umiarsualiviani aqutsisulerluni alakkarterisoqarpoq, tamatumani inuutissarsiornermut umiarsualiveqarnermiit misigisassanngorlugu najuaqarfinngorlugulu allanngortitterneqarnissaa pilersaarusiorfigineqarnissaalu sammineqarlutik. Aalborg-ip borgmesteria Henning G. Jensen kommunip allaffittoqaani oqinnerusunik nerisassartalinnik ullup qeqqarsiornissamut qaaqqusivoq, angalanerup Aalborg Historiske Museum-imi Kalaallit Nunaat Aalborg-imi saqqummersitsinerup pisortatigoortumik ammarnissaanut ingerlaqqittoqannginnerani. Saqqummersitsineq 2010 aasaata tungaanut ingerlanneqassaaq, ilaatigullu Aalborg-ip Kalaallit Nunaannut attuumassuteqarnerata takuneqarsinnaanissaanut pilersitsinissaq siunertaavoq.