Ukioq manna aasaanerani atuartut atuanngiffeqarnerani piumasunut Kangerlussuarmit Sisimiunut pisutsitsineq juulip 26-a aallarnerfigalugu ingerlanneqarpoq, peqataasut inuit katillugit 17-it peqataaffigineqarluni. Inuit 17-ininngaannit 15-it august-ip aappaani Sisimiunut apuupput. Tamannalu piviusunngortinneqarpoq Qeqqata Kommuniani Timersornermut siunnersortimit pilersaarusiorneqarluni.
Ulluni arfineq marlunni illuaqqamit illuaqqamut sialuk anori, qulisimasoq seqinnarillu sapaatip akunnerata ingerlanerani misigalugit ingerlaarfigineqarpoq. Aqqutaanilu umimmak, tuttut, teriannissat, aqissit, eqaluit, ukallit nattorallit naapitassaallutik.
Pisunnermi atuartut peqataasut tassaapput: Aputsiaq Aronsen, Angutitsiaq Lynge, Nikki Olsen, Niklas Møller, Martin E. Olsen, Angerla Berthelsen, Qillaq L. Olsen, Pernille Sørensen, Lena Sommer Bjørn, Elvira Kreutzmann aammalu Seri Berthelsen.
Pisunnermi nakkutilliisut: Karl Kasper Olsen, Nick Møller, Rune Olsen Lennert, Amalie Kleist, Sikkersoq Møller aammalu Karl Berthelsen.
Ukioq 2008 siullermeerluni Timersornermut siunnersortimit aammalu Asilerisuusimasumit pilersaarusiorneqarluni atuartunik pisutsitsineq ingerlanneqarpoq, iluatsilluartumik.
Pisutsitsinerup siunertaraa atuartut atuanngiffeqarnerani illoqarfimminniiginnartussat susassaqartinnissaat, asimilu assigiinngitsorpassuarnik misigisaqartinnissaat. Pisunnissami peqataanissaminnut kajumissuseqartut arlallit allatsittaraluarlutik peqataasussat amerlassusissaat killeqartarput. Periarfissinneqarsimasullu misigisaat annertooq nunatsinni aningaasaliisartuninngaanniit Nunafonden, Inuuneritta aammalu Isumaginninnermut Naalakkersuisoqarfimminngaanniit aningaasaliiffigineqarnikkut piviusunngorsinnaasimalluni.
Qeqqata Kommunianinngaanniit kajumissaarutigerusunnarpoq illoqarfimmi sammisaqartitserusullutik kajumissuseqarsinnaasut, peqatigiiffiit, illoqarfimmiut, soqutigisaqaqatigiit assigisaallu suliniutinik pitsaasunik pilersaarusiorluakkamik pilersitsisiniartarnissaat aningaasaateqarfinnut qinnuteqarnermikkut.
Pilersaarusiornissamut annertunerusumik paasissutissanik aallertoqarsinnaavoq Qeqqata Kommunianut, Ilinniartitaanermut immikkoortortaqarfimmut.