Sisimiut Umiarsualiviata allilerneqarnissaa pillugu aningaasaqarnermut ataatsimiititaliap siunnersuutaa, Qeqqata Kommuniata kommunalbestyrelsiata tallimanngornermi oktobarip 28-ani ataatsimiileruni isummerfigissavaa. Aningaasaqarnermut ataatsimiititaliap siunnersuutigaa, umiarsualivik 2012-imi 2013-imilu pilersinneqassasoq, taamaalilluni 2013-imi aasaanerani uuliasiorluni qillerinissanut naatsorsuutigineqartunut naammassereersimaniassammat.
Taamaaliornikkut kommunip aammalu Sisimiut suli ineriartorneranut umiarsualivimmillu talliliinissamut akisussaaneq Qeqqata Kommuniata tiguniarpaa, Namminersorlutik Oqartussat suliffeqarfiilluunniit aningaasaleerusullutik peqataarusuttut apeqqutaatinnagit. Alliliinissamik aningaasalersuinissamut aningaasat ilaatigut kommunimut akileraarutip 25 procentmiit 26 procentimut qaffanneqarneratigut nassaarineqassapput.
Qeqqata Kommuniata borgmesteria Hermann Berthelsen isumaqarpoq, maanna
iliuuseqarnissamut piffissanngortoq:
- 2013-imi uuliasiorluni
misissuisoqassagaluarpat naamiluunniit, umiarsualiviup allilerneqarniisaa
pinngitsoorneqarsinnaanngilaq. Sisimiuni pissutsit taamaatsillugit, kilisaatit,
umiarsuit tunitsiviit, umiarsuit takornariartaassuit umiarsuillu uuliasiortunik
sullissisut umiarsualivimmi inissaqanngillat, taamaalillunilu nunatta iluani
nunanilu allani taliffissarsiortarlutik.
Umiarsualivimmik alliliinissap Sisimiuni ineriartornermut annertusaassasoq
borgmesterip aamma neriuutigivaa:
- Umiarsuit angisoorsuit Sisimiut
Umiarsualiviannik toqqaasannginnerata kingunerinikuuvaa, Sisimiuni
suliffissaaleqisut amerliartornerat, tamaalilluni umiarsualivimmi
sanaartornissamut aningaasaliineq tamakkuninnga aallartitseqataassaaq. Uanga
neriuutigaara, alliliinitsigut inuit amerlanerusut sulilersissinnaagigut,
sulinngiffeqanngikkallarnermullu pisortallu ikiorsiissutaannut kiisalu
akileraarutinut qaffakkaluttuinnartunut aningasartuutigut ikilisillugit.
Ilimanarsinnaavorlu kommunimut akileraarutitta qaffanneqarnera
sivikissinnaasoq.
Paasissutissat allat
Alliliinissaq pillugu
paasissutissanut annertunerusunut borgmester Hermann Berthelsen oqarasuaatikkut
52 75 56-ikkut attavineqarsinnaavoq.