Maniitsumi sunngiffimmi tuniniaasartut tallimanngornermi maajip 31-ani tuniniaavissaat nutaat atoqqaartinneqassapput, tassa illoqarfimmi Pilersitsivimmi atuartut sanaarisaat. Atoqqaartitsineq qulinut ammarneqassaaq, ullullu sinnerani ingerlanneqassalluni.
Maniitsumi Pilersitsiviup sannaviini atuartitaasut, ukiup ingerlanerani sunngiffimmi tuniniaasartut tuniniaavissaat suliarisimavaat. Tuniniaavissat massakkut inissinneqarsimalereerput, tassalu nalliuttorsiualaarutigisamik atoqqaartinneqarnissaat tallimanngornermi maajip 31-ani quliniit pisussanngorluni. Tuniniaavissat angisuut marluusut illoqarfiup atuarfiata silatinnguanut inissitaapput. Tuniniaavissat innuttaasunit suliaqartitanit suleqateqarnikkut pilersitaapput, taakkulu namminneq ilusilernikuullugit.
Oqalugiarnerit, sammisassat kaffisuunnerlu
Borgmesterip
tulia Gedion Lyberth oqalugiassaaq, illoqarfimmilu inuutissarsiuteqarfiit
peqataassallutik, Inuutissarsiutinut ataatsimiititaliap siulittaasua aamma
peqataassaaq, soorunalimi innuttaasorpassuit aamma, kaffillertoqassaaq
il.il.
Ullormi sorpassuit tuniniaasarfimmi sammisassaritinneqassapput: Illoqarfimmi
eqqumiitsuliortut ullup ingerlanerani tamaani suliaqassallutik, innuttaasut
tuniniaavimminniit tuniniaassallutik, Pisiffik naatitaarniassaaq, kiisalu Rita
Sport aamma Butik Kaaka aamma tuniniaaveqassallutik.
Tamakku saniatigut
nipilersortoqassaaq, aammalu Maniitsumi inuusuttut breakdance-mik
takutitsissallutik.
Pilersitsivimmi atuartut naammassisut siulliit
allagartartaartinneqassapput
Pilersitsivik kommunimit
Namminersorlutillu Oqartussanit aningaasaliiffiulluni "Inuusuttut
suliffissaaleqisut iliuuseqarfiginissaanni pilersaarutit "-tut
pilersitaanikuuvoq. Atuartut siulliit sisamanngornermi maajip 30-ani
qaniginerusaat peqataallutik nalliuttorsiualaarnertalimmik
allagartartaartinneqassapput.
Paasissutissat annertunerusut
Piareersarfiup pisortaanit
Mogens Fontain, oqarasuaat 81 7245 imaluunniit Maniitsumi Qeqqata Kommuniani
Ilinniartitaanikkut pisortamut Ann Stephens, oqarasuaat 81 78 34
saaffiginninnikkut pissarsiarineqarsinnaapput.