2014-imut Aningaasanut inatsisissatut siunnersuut Borgmester Hermann Berthelsen-ip eqqarsarnartoqartippaa. Kommunikkaartumik agguataarilluni takussutissami takuneqarsinnaavoq, Qeqqata Kommunia sanaartorfiunnginnerpaanissaanik Namminersorlutik Oqartussanit anguniarneqartoq. Sisimiunut 3 mio. koruuniinnaat aningaasaliissutiginiarneqarput, Maniitsumullu aningaasaliissuteqartoqarniarani.
Ukiuni kingullerni Namminersorlutik Oqartussat aningaasaliissuteqartannginnerinut taarsiullugu, Qeqqata Kommunia sanaartornissamut missingersuutiminut annertuumik aningaasaliissuteqartarpoq. Illoqarfinni meeqqeriviliortitsivugut, Sisimiunilu talittarfiliortitsilluta, soorluttaaq illoqarfinni sanaartorfigissaatitsisugut. Ilaatigut karsimi uninngasuuteqarluarnitsigut taakku isumagisinnaasimavagut, naallu akileraarut procentimik qaffannikuugaluartoq uninngasuutigut nunguliivipput, taama Hermann Berthelsen paasissutissiivoq.
Namminersorlutik Oqartussat sinerissamut, takusinnaasatsitullu soorunalimi aamma Qeqqata Kommunianut, akisussaaffimmik annerusumik tigusisariaqaraluarput. Pingaartumik nuna tamakkerlugu inissianik ingutserisoqarnissaanut, taartissanillu inissianik sanaartornissamut suli pilersaarusiortoqarsimannginnera, Qeqqata Kommuniani borgmesterip eqqarsarnartoqartippaa. Nuup avataani inissiat aamma aserfallakkiartorput, uagut Nuup avataani illoqarfiusugut aamma inissiatoqqanik ingutserneqariarlutik nutaanik sanaartornikkut taarserneqartussaateqartugut sooq nutaanik sanaartorsinnaanngilagut.
Naalakkersuisuunikunut sanilliullugu Naalakkersuisut 2014-imut Aningaasanut Inatsisissatut siunnersuutitigut Nuummi inissianik ingutserinissamut, taartissanillu sanaartornissamut 192 mio. koruuninik immikkoortitsipput, illua-tungaatigulli sineriarmiut aningaasanik sunnguamilluunniit immikkoortitsivigineqaratik. Assersuutigalugu Maniitsumi Salliarnartami inissianut taartissanik sanaartornissamut, 2009-mut Aningaasanut Inatsisitigut 110 mio. koruunit immikkoortinneqarput. Inissiassanut 125-nut aningaasaliissutit Naalakkersuisut nutaat 2010-mi peerpaat, taamaalillunilu Maniitsup illoqarfiata nutarterneqarnissaanut pilersaarutit taamaatinneqarlutik.
Salliarnartami inissiarsuit qaqortut, illoqarfimmiunut pakatsinartumik aserfallakkiartuinnarlutik suli ingutserneqanngillat. Qeqqata Kommuniani naatsorsuutigigaluaratsigu, neriuuteqalersitseqqittumik, Maniitsumilu nutaanik inissialiornissamik kinguneqartussamik, Maniitsumi inissiat ingutserneqarnissaannut, taartissatullu inissialiornissamut pilersaarutit Naalakkersuisut nutaat saqqummissagaat. Tamatuma saniatigut Sisimiuni inissiarsuit qaqortut eqqarsaatigalugit taamatorluinnaq ajornartorsiuteqarpugut. Taamaakkaluartoq Maniitsumi Sisimiuniluunniit ingutserisoqarnissaa, taartissanillu sanaartortoqarnissaa pingaartillugit Naalakkersuisut ajoraluartumik tulleriiaarisimanngillat, taama Hermanna Berthelsen, 2014-imut Aningaasanut Inatsit pillugu Naalakkersuisunik Inatsisartunillu oqaloqateqarnissaminut qilanaaruteqartoq naggasiivoq.