A/S Inissiaatileqatigiiffik INI-p pisortaanissarsiornera, atorfilittanullu aqutsisussarsiornera Borgmester Hermann Berthelsenip tupigusuutigaa. Atorfiit taakku marluk Sisimiuniikkunnaarlutik Nuummut nuunniarneqarput.
Tamannali naammanngilaq. Allagarsiussaq naapertorlugu ”uppernarsaatilimmik suliffeqarfimmik allannguisimaneq imaluunniit ”ingerlatsivimmik nalimmassagaasumik” allannguinermut suleqataasimaneq” pisortaanissamut piumasaqaatigineqarpoq.
Taamatut nuutsitsiniarnerup siunertaa, ilutigalugu Kalaallit Nunaata ataatsimoornerulernissaanik politikkikkut oqariartuutigineqartunut akerliusoq Hermann Berthelsenip paasiuminaatsippaa. Nunatsinni assigiinnerusumik angusaqarlutalu ineriartortitsissagutta, Nuummut nuutsitsisoqarani killuup tungaanut Nuummiit nuutsitsisoqassaaq.
Atorfinnik Nuummut nuutsitsilluni INI-p atorfinnut inuttassarsiuussinera, pisortat suliffeqarfiutaannik arlalinnik Nuummut nuutsitsinikkut Qeqqata Kommuniata eqqugaasimaneranut tapertaaginnarput. Taamaalilluni Greenland Venture Maniitsumit Nuummut nuunneqarnikuuvoq, Sisimiuni nutserisunngorniarfik byggeteknikerinngorniarfillu Sisimiunit Nuummut nuunneqarnikuupput, NaviAir-ilu Kangerlussuarmit Nuummut nuunneqarnikuulluni.
Nunanut tamanut ineriartuutaasumik nunani allani pisortat
aningaasaliiffigisimasaat suliffeqarfiutaallu siammarteraat, nunatsinni
illoqarfik ataasiinnaq ineriartortinniarneqarluni illoqarfimmi ataasiinnarmi
ataatsimoortinniarneqarput. Tamanna kingunipiluttorujussuusussamik
ineriartortitsineruvoq, tamanna pillugu Naalakkersuisut maanna
nassuiaateqarnissaannik kissaateqarluni borgmesteri taama oqarpoq.