2015-imi oktobarip 15-iani Qeqqata Kommuniani Maniitsumi Ilaqutariinnut inerisaaviup "Ikiaroornartoq naaggaarpara"-mik qulequtserlugu innuttaasunut ataatsimiisitsinermi, Qeqqata Kommuniani pitsaaliuinermi siunnersorti Albrecht Kreutzmann ima oqaaseqarpoq "Aarlerinarnerpaajusarluni, meeqqap inuusuttuaqqallu timikkut qarasakkullu suli inerikkiartorfissaminni aallartissutigigaangamikkik misiliinerinnakkulluunniit qaratsakkut innarlerneqaatigereertaraat.".
Imigassamik ikiaroornartumillu atornerluineq pillugu Maniitsup Katersortarfiani oqalliseqataanissaq innuttaasut akornannit assut soqutigineqarpoq - atornerluinermik ajornartorsiut annertungaatsiartoq paasinarsivoq.
Saqqummiisut ilaat; Anne Grethe Josefsen aamma Margrethe Kreutzmann Maniitsup Peqqissaavianit saqqummiinerminni, 2012-imiit 2015 tikillugu naartusut aappaasullu/uijusullu katillugit 39-t ikiaroornartumik atornerluisuunerinut katsorsarneqarnissaannik innersuussisimanerminnik paasissutissiipput. kisitsisit taakku saniatigut ikiaroornartumik atornerluisut amerlanerunissaat naatsorsuutigineqarpoq, kisitsisillu ernumanaatissaqarnermik takussutissiipput. Maniitsumi ikiaroornartumik atornerluinermut akiuunnissamut inuiaqatigiit ataatsimoorlutik akiuunnissaat Peqqissaavimmi sulisunit kaammattuutigineqarpoq.
Atornerluinermik ajornartorsiut Miljøarbejderimit Inger O. Lyberth-imit uppernarsarneqarpoq, ilaatigut sullitat ilaannik oqaluttuassarsiarisimasani una oqaatigaa, meeqqat arlariiullutik aningaasanik katerseriarlutik ikiaroornartumik pisiniartartut, tamatumalu kingorna allamukarfissaqannginnamik qaqqamukarlutik ikiaroornartumik pujortariartartut. Meeqqat inuusuttullu aqqanillit 15-illu akornanni ukiullit pineqarput. Atornerluinermik ajornartorsiutip assitalerlugu saqqummiunneqarnera innuttaasunit assut tupaallaatigineqarpoq.
Innuttaasunik ataatsimiisitsinermut politiit aamma peqataapput, taakkulu Kalaallit Nunaat tamakkerlugu 2009-miit 2013 tikillugu hashit arsaarinnissutaasimasut annertussusaat kisitsisinngorlugit saqqummiuppaat, nunalu tamakkerlugu tamanna annertusiartuinnartoq takuneqarsinnaavoq.
Innuttaasunik ataatsimiisitsinerup siunertaraa, ikiaroornartumik atornerluinermik ajornartorsiutip kiisalu ilaqutariinnut peqqinnermullu kingunerluutigisinnaasai oqallisigineqarnissaat. Taamatullu innuttaasut suliffeqarfiillu nalunaartussaatitaanerinik erseqqissaanissaq siunertaavoq. Matumani siuliani taakkartorneqarlutik uppernarsaatit tupaallannaqisut aallaavigalugit, pissutsinik atuuttunik kiisalu atornerluinerup kinguneranik innuttaasut ilisimaarinissaaq siunertaavoq.