Oqallinneq pitsaasoq
Assigiimmik siunissaqarusuppugummut saqqummiussarput tigulluarneqarnera assut nuannaarutigaarput. Saqqummiussaq tusagassiorfiit oqallittarfiini politikerit pitsaasumik oqallinnermik aallarniivoq, qularnanngitsumillu aamma nunarput tamakkerlugu angerlarsimaffippassuarni. Taanna pillugu pitsaasumik oqallinnissarput pingaarutilerujussuuvoq.
Maanna kommunalbestyrelsitsinnut nalunaarusiap saqqummiunnissaa qilanaaraarput, kommunit akornanni pingasuusuni kommunalbestyrelsit ataatsimiinnissaminni nalunaarusiaq eqqartortussanngorpaat. Oqallinnissaq qilanaaraarput. Aammattaaq neriuutigaarput isumaqataagaanni isumaqataanngikkaluaraanniluunniit Naalakkersuisut, Inatsisartut, Kommuneqarfik Sermersooq aamma Kanukokap nalunaarusiaq eqqartorumaaraat.
Aningaasaqarneq siuarsartariaqarpoq
Illoqarfiit pingaarnersaanniit nunap sinneranut suliffinnik 600-nik nuutsisoqarnissaanik siunnersuutitta aningaasatigut kingunerisinnaasai pillugit tusagassiortunit innuttaasuniillu nalinginnaasuniit ujartuisoqartoq maluginiarsimavarput. Apeqqut pingaaruteqartoq akissuteqarfigisinnaasimanngilarput, Nutserisunngorniarfiup, Naviair, Arktisk Kommando, Pisiffik aammalu INI-p ilaa illoqarfiit pingaarnersaannut nuunneqarnerinut aningaasartuutaasimasunut paasisaqarsinnaasimannginnatta.
Illoqarfiit pingaarnersaannut taakku nuunneqarnerinut attuumassuteqaataasimasunik aningaasartuutaasimasut pillugit Namminersorlutik Oqartussat paasissutissiissasut naatsorsuutigaarput. Namminersorlutimmi Oqartussat illoqarfiit pingaarnersaannut taakku nuunneqarnissaasa qulakkeerneqarnissaanut toqqaannartumik toqqaannanngitsumillu peqataanikuupput. Taamaattorli tusarnikuunngilarput anertuumik aningaasartuutaassasoq, qitiusunngorsaasimanermut uniffiunngimmat. Tigussaasunik taakkunannga Namminersorlutik Oqartussat saqqummiinissaat qilanaaraarput.
Oqaloqatigiineq assigiissoq
Nalunaarusiami tusagassiortut soqutigisimanngisaat immikkoortoq maluginiaqquvarput, tassaasorlu suliffeqarfinnik siammarterineq siunissami nunap immikkoortuini assigiissumik oqaloqatigiinnermik pilersitsissammattaaq. Maanna illoqarfiit pingaarnersaanniipput aammalu namminersorlutik oqartussat aktieselskab pigisaanni siulersuisuni, siunnersuisooqatigiittut pilersitani aammalu kommissionini ilaasortat nunat allaneerssuupput. Siulersuisuni, siunnersuisooqatigiinni kommissioninilu taakkunani nunap sinneranit issiasinnaasut `pingaarutillit` ikittuinaasimagunarput.
Namminersorlutik Oqartussani immikkoortortaniittut ilinniarluarsimasut nunap sinneranut nuuppata siulersuisuni, siunnersuisooqatigiinni kommissioninilu issiaannarsinaasut isumaqarpugut aammalu nunap immikkoortuisa akornanni aamma illoqarfiit pingaarnersaasa nunallu sinnerata akornanni assigiissumik oqaloqatigiinnermik tunniussisinnaassajunnarsillutik!
Periarfissat assigiissut
Amerlasuutigut tusartarparput, kommunitsinneersut inuusuttut ilinniarluarsimasut suliffittaarniarlutik illoqarfiit pingaarnersaannut ujartuisariaqartartut, naak angerlarsimaffittut illoqarfimminniiginnarusukkaluarlutik ilaquttaminnullu qanittumiikkusukkaluarlutik. Pisortat suliffiutaannik assigiinnerusumik agguataarinikkut, inuusuttagut ilinniarluarsimasut nunatta sinnerani najugaqarsinnaalissapput nunalu tamakkerlugu akisussaaffinnik tiguseqataallutik. Ilaqutariinni nunalu tamaat isigalugu ataqatgiinnerulerneruvoq – aammalu nunat immikkoortuini nunalu tamakkerlugu nammineernerulersinnaalerluta.