Septembarip 23-anit 25-ata tungaanut Kalaallit Nunaanni Sisimiuni aalisarneq pillugu Polar Fish saqqummersitsinissami saqqummiisussat 50 missaaniittut pulaartussanik tigusinissamut piareersimapput. Tassani aalisarnermik inuutissarsiuteqarnermut inuutissarsiutinullu allanut ingerlariaatsit periutsillu nutaat atortullu nutaat takutinneqassapput, aammalu saqqummersitsinersuarmik aaqqissuisut massakkut Qeqqata Kommunianik, Arctic Circle Business aamma Aalborg Kongres & Kultur Center (AKKC) suleqatigalugit toqqarsimavaat, saqqummiinerit sakkortuut imaqarluartullu immikkut ukkartarineqarnissaat, suliffeqarfinnut, aallarnisaasunut aammalu saqqummersitsinersuarmut tikeraanut saaffiginnittut.
Kalaallit Nunaata avammut assartuinera annertusarneqassaaq
Saqqummersitsinersuup isumasioqatigiinnertai aalisarnermik inuutissarsiuteqarnermut avammut assartuineq, aningaasalersuineq atugassarititaasullu pillugit sammisaqassapput, tassanilu saqqummiisoqarlunilu oqallittoqassaaq. BusinessAalborg aamma Artic Circle Business kalaallit sumiiffinnut nunallu immikkoortuini suliffeqarfiinut aallarnisaasunullu immikkut saaffiginnittumik avammut assartuinermi ingerlariaaseq pillugu isumasioqatigiisitsissapput. Kalaallit Nunaanni aningaasaqarnerup ineriartortinneqarnissaanut naatsorsuutit annerit ilagivaat avammut assartuinerup annertusarneqarnissaa. Taamaattumik avammut assartuinermi tikitassanik periarfissanik tamakkiisumik kalaallit suliffeqarfiinut tamakkiisumik suli atuisimanngitsunut aaqqissuussisoqarpoq. Ilaatigut missingersuutinik peqqissaarussanik niuernermi quppersakkanik allattuganngukkanik suliaqartoqassaaq, avataani suleqatigisanut, aningaaserivinnut il.il. aningaasalersuisinnaasunut qinnuteqarnissamut atugassatut tunngaviusinnaasut.
GrønlandsBANKEN, Greenland Venture, Greenland Business og Vækstfonden aningaasalersuisarneq pillugu isumasioqatigiisitsinissaminni ineriartorneq avammullu assartuineq ukkatarissavaat. Uani saqqummersitsinersuarmut pulaartut, sumiiffimmi inuutissarsiornermi suliffeqarfiit, ilinniartut pisortallu ingerlataanni atorfillit aningaasalersuinermi aallerfiusinnaasut pillugit ilisimasassanik pissarsisinnaapput.
Taakku saniatigut aalisarnermik inuutissarsiornermut atugassarititaasut pillugit oqallitsitsisussanik immikkoortumi saqqumilaartunik pingaarnernik peqataaffigineqartumik oqallitsitsisunik pilersaarusiortoqarpoq, aammalu Kalaallit Nunaanni aalisarnermut naalakkersuisoq Nikolaj Jeremiassen ilaatigut peqataassaaq.
Saqqummersitsinersuup ingerlanerani aammattaaq ingerlaavartumik KNAPK oqalugiartarlunilu paasissutissiilluni ataatsimiisitsisassaaq.
Saqqummiisunut saqqummersitsinersuaq pissarsinartoq
2014-imi saqqummersitsinersuaq Polar Fish 1.593-inik pulaarneqarpoq, taannalu kisitsisaavoq annerpaaq. Saqqummiisut aamma annertuumik naammagisimaarinnillutik nalunaaruteqarnikuupput, ilaallu nutaanik isumaqatigiissuteqarlutik pitsaasunillu inniminniinissamik periarfissarsisimallutik angerlarlutik. Ukioq manna saqqummersitsinissarsuarmi saqqummiisussat 50-it missaaniissasut naatsorsuutigineqarpoq, nutaatullu polenimi suliffeqarfik aallartitaqartussaalluni. Taakku saniatigut Island-imit, Norge-mit, Savalimmiunit, Danmark-imit Kalaallit Nunaanniillu il.il. saqqummiisoqassaaq.
Paasissutissat sukumiinerusut pillugit attavigineqarsinnaapput direktør Bjarne Ellgaard Pedersen, Arctic Circle Business oqarasuaat +299 863500 imaluunniit Else Herfort, AKKC oqarasuaat +45 9935 5518