Nutaatut suliniummi ukiup atuilluartuunissakkut suliniutitsialaanik aqutsisumik akissarsititsisoqanngilaq, kisianni paarlattuanik suliniaqatigiit toqqarneqarlutik. Akissarsiaq suliniummi atugassatut 100.000 koruuninik malitseqartoq, takorluukkap ataani suliniutit ilagisaat suliniut nr. 7-imut tunniuneqarpoq, uuma ataaniippoq: ”Ataqatigiissumik tamat isiginnissuteqartumillu ilinniartitaanermik pilersitsineq.”
Suliniummi `Nunaqarfinni atuartunik peqataalersitsineq' suleqatigiit tassaapput nunaqarfinni atuarfinni pisortat ilinniartitsisullu kiisalu sumiiffinni ilinniartitaanermut pisortat. Suliniummi suleqatigiit tamaasa sinnerlugit check-imik 100.000 koruunimik tigusisuupput Maniitsumi Sisimiunilu Ilinniartitaanermut pisortat Anna Heilmann aamma Annga Lynge.
Suliniutip `Nunaqarfinni atuartunik peqataalersitsineq`-mik toqqarneqarneranut qullersaqarfiup tunngavilersuutigaa, suliniut maligassaasutut isigineqarnera, immikkoortumi pingaarutilimmik attuisimasoq, atuartut ataasiakkaat siunissaannut annertuumik pingaarutilimmik. Suliniut marlunnut agguarneqarsimasoq, ukuninnga imaqarpoq:
- Angajoqqaanut skolehjemmimiittuutilinnut sapaatip akunnera naanersiorneq, illoqarfimmi meeqqaminnik takunninnisamut periarfissaqalerlutik, taamaalillunilu meeqqamik ulluinnarni qanoq misigisimanerannik, qanorlu ingerlanerannik takunnissinnaalerlutik .
”Meeqqanut skolehjemmimi najugalinnut angajoqqaat, atuarfinni pisortat/ ilinniartitsisut, aammalu ilaqutariinnermut immikkoortortami sulisut kiisalu ilaqutariinnut inerisaavik ataatsimoorlutik sapaatip akunnera naanersiorput, tassanilu atuartut atuarfimmi ingerlanerat, illoqarfimmilu ulluinnarni inuunerat tusagaqarfigalugu. Atuarfiup meeqqanut suliniarnerata angajoqqaajusut ilaqutaasullu tapersersuinissaat, aammalu ilaqutaasunik qaninnerusumik suleqateqarnermik pilersitsinissaq anguniagaavoq." Maniitsumi ilinniartitaanermut pisortaq oqaluttuarpoq.
- Nunaqarfinni atuarfiit aammalu inuusuttunut ilinniarfiit akornanni ataqatigiilersitsineq, inuusuttunut ilinniarfimmi aallartikkunik ulluinnarni qanoq innissaminnut, qanoq najugaqarnissaminnut takunninnissaannut periarfissiivoq. Assersuutigineqarsinnaavoq GUX-imi qanoq ilinniartuuneq, aammalu ilinniaqqiffinnut tiguneqarnissamut pisariaqartumik minnerpaamik piumasaqaatit suuneri pillugit paasissutissinneqarneq. Tamanna atuartut takorluukkaminnik piviusunngortitsinissaannut ilaavoq. Ilaatigut Atammimmit, Itillimit, Sarfannguanit Kangerlussuarmiillu nunaqarfinni atuarfinni atuartut illoqarfinnut "paasisassarsiornikuupput".
Tassani ilaatigut inuusuttunut ilinniarfinni ulluni nalinginnaasuni misigisassanut kiisalu suliffeqarfinnut ilinniartoqarfinnullu pulaarnissamut periarfissiivoq.
”Suliniutitigut siunertaasoq tassaavoq, nunaqarfinni atuarfiit, pingaarnertullu atuarfiup akornanni pitsaanerusumik ataqatigiinnermik pilersitsineq, suleqatigiinnerup nukittorsarneqarneranik aammalu nunaqarfinni atuartutut nunaqarfinnilu ilinniartitsisunut ilisimasanik kivitsineq. Illoqarfinni atuarfinni atuarfiup ingerlariaasianik nunaqarfinni atuartut ilinniartitsisullu takunnissinnaalissapput.” Ilinniartitaanermut pisortaq Annga Lynge oqaluttuarpoq.
”Suliniutinik taakkunannga neriutigaarput, nunaqarfinni inuunermiit illoqarfimmi inuunermut ikaarsaarnerup oqinnerulernissaa, aammalu angerlarserneq pissutigalugu maanaannaq unittarnerup annikinnerulernissaa. 100.000 koruuninik akissarsititsinikkut nunaqarfinnit atuartut illoqarfinni amerlanerulernissaat neriuutigivarput, minnerunngitsumillu atuartut angajoqqaavisa meeqqamik tikeraarnissaanut periarfissaqarnerulernissaat” Pisortaanerup sulisuini pisortaq Hans Christian Sværd oqarpoq.
2020-mi inuiaqatigiit atuilluartuunissaannik sulisoqarnissaanik 2012-imi kommunalbestyrelsi aalajangiimmalli, ilinniartitaanerup, isumaginninnerup avatangiisillu iluini atuilluartuunermik ukkataqartunik kommuni suliniutinik 34-nik aallartitsinikuuvoq.