Kalaallit Nunaanni pinerluttulerinermi inatsit naapertorlugu ikorfartuisut pillugit nalunaarut nutaaq 2016-imi maajip aallaqqaataani atuutilersinneqarpoq. Nalunaarut naapertorlugu kommunit politimesterimut ikiorfartuisussanik arlalinnik innersuussaqassapput.
Qeqqata Kommunia matumuuna ikorfartuisussanik tallimanik allattorsimaffianiilerusuttunik innersuussassanik pissarsiorpoq.
Ikorfartuisussanngortitat suliassaat pisinnaatitaaffiilu ilaatigut makkuupput:
- Pasineqartoq, unnerluutigineqartoq eqqartuunneqartorluunniit peqatigalugu iliuuseqarneq.
- Illersuisoq peqatigalugu pasineqartup, unnerluutigineqartup eqqartuussaasulluunniit eqqartuunneqarnerani ikorfartussallugu.
- Eqqartuunneqartup inuttut inissisimanera pillugu nalunaaruteqarsimanissaq, soorluttaaq napparsimmavimmi imaluunniit napparsimmaviup immikkoortortaani, inissiivimmi imaluunniit pineqaatissinneqarsimasunut inissiisarfimmi allatigulluunniit utaqqiisaasumik inissinneqarsimanerata pisariaqanngitsumik sivitsorsarneqannginnissaanut iliuuseqarneq.
- Ikorfartuisup pasineqartoq, unnerluutigineqartoq imaluunniit pineqaatissinneqartoq maalaaruteqarsinnaanermut siunnersorlugulu ilitsersussavaa, soorluttaaq Kalaallit Nunaanni pinerluttulerinermi inatsisip § 159-ia aamma 162-ia naapertorlugit, pineqaatissiissutip allanngortinneqarnissaanut suliassanngortitsisinnaanermut periarfissanik siunnersorlugulu ilitsersussagaa.
- Ikorfartuisup pineqartup maalaaruteqarnissaani aamma pineqaatissiissutip allanngortinneqarnissaanut imaluunniit - atorunnaarsinneqarnissaanut qinnuteqarnissaani ikiorsissavaa kiisalu suliassat taakkua suliarineqarnissaani ikiorsissallugu.
Kikkut ikorfartuisussatut innersuunneqarsinnaappat
Ikorfartuisut allattorsimaffianut ilanngutissaguit marluinnik, imaappoq kalaallisut qallunaatullu oqaaseqartariaqarputit.
Politiinut oqaaseqaammik siumut pissarsereersimanikkut ikorfartuisussaq toqqarneqartarpoq. Oqaaseqaatip tunniunneqannginnerani, allakkatigut akuersissummik pissarsereernikkut, qinnuteqartumut tunngatillugu Pinerluuteqarsimasunik Qitiusumik Nalunaarsuiffimmut paasissutissanik politiit piniassapput.
Tarnikkut nappaatilinnut inissiisarfimmi imaluunniit annertuumik nappaatilinnut napparsimmaviup immikkoortortaani angerlarsimaffimmiluunniit il.il. atorfillit ikorfartuisussanngortinneqarsinnaanngillat. Tarnikkut nappaatilinnut imaluunnit immikkoortortami imaluunniit angerlarsimaffimmi il.il. ingerlatsinermik allaffissornermilluunniit suliallit aamma ikorfartuisussanngortinneqarsinnaanngillat. Unnerluussisussaatitaasuni, politiini, pinerluttunik isumaginnittoqarfimmiluunniit atorfillit aamma ikorfartuisussanngortinneqarsinnaanngillat.
Ikorfartuisusanngortitaaneq pillugu paasissutissat annertunerusut, Qeqqata Kommuniani atuilluartuunissamik suliniutinut siunnersortimut Hans Henrik Olsen-imut (+299 867314), e-mail: hhol@qeqqata.gl saaffiginnissuteqarnikkut pissarsiarineqarsinnaapput.
Qinnuteqaateqarnissamut piffissaliussaq
Qinnuteqaat imminermut tunngasunik paasissutissanik ilaqartinneqartoq, kingusinnerpaamik 2016-imi oktobarip 14-iani nassiunneqarsimassaaq.
Qinnuteqaat uunga nassiunneqassaaq:
Qeqqata Kommunia
Postboks 101
3911 Sisimiut
E-mail: qeqqata@qeqqata.gl