Saqqummersitsinerup ilusaa
Saqqummersitsineq takunnittussanut assigiinngisitaartunut saaffiginnittuuvoq, taamaalilluni nunaqavissunut meeqqanut inersimasunullu aammalu takornarianut tamanut naleqqussagaalluni. Saqqummersitanut oqaasertaliussat naatsukullammik ersarissumillu kalaallisut, qallunaatut tuluttullu allassimallutik aammalu atuartitsinermut atatillugu atorneqarluarsinnaallutik.
Saqqummersitsinermi assilissat, qalipakkat assilisallu assigiinngitsut, ilaatigut Aalut Kangermiup , Aka Høeghip aammalu Kârale Andreassenip assilialiaat qalipagaallu kiisalu William Thalbitzerip aammalu T.H. Krabbep assilisaat qimerloorneqarsinnaassapput.
Igalaat saagussaannik annoraaminernik saqqummersitsineq aaqqissugaavoq, taamaalilluni angallakkuminartuuvoq, siunertaavorlu saqqummersitsineq katersugaasivinnut allanut imaluunniit soqutiginnittunut allanut nunatsinniittunut nunattalu avataaniittunut attartortinneqarsinnaassasoq – asssersuutigiinnarlugu Danmarkimi kalaallit illuutaannit attartorneqarsinnaanerumaarlutik.
SIunertaq
Saqqummersitsineq nalinginnaasumik ilisimasaqarnerulernissamik siunertaqarpoq aammalu saqqummersitsineq aqqutigalugu inuiaat kalaallit/inuit kulturikkut oqaluttuarisaanerat kulturikkullu kingornussaat immikkut saqqumilaartissallugu. Siunertat aamma ilagivaat saqqummersitanik takuniaasut angakkut pillugit paasisaqarusunnerulernissaannik aammalu paasissutissanik atuagassianillu misissuerusulersinneqarnissaannik saqqummersitat kaammattuutaassasut.
Sammisaq tassaavoq naggueqatigiit Inuit angakkoqarnerup tungaatigut ileqqui – matumani ilanngullugu kristumiussutsip issittumut eqqunneqannginnerani silarsuaq pillugu paasinnittariaasiat aammalu issittumi/Kalaallit Nunaanni inuuniarnermi atugassarititaasunut ataqatigiissusiat, taamatuttaaq kristumiunik (ilisimatusarnermillu) naapitsinermi malitsigisaasut.
Matumani sammineqartoq pillugu ilisimasat annertusarneqarlutillu siammarterneqarnissaat pingaaruteqarpoq, aamma ullumikkut inuiaqatigiit Kalaallit inooriaasiannut sanilliullugu ataqatigiissillugulu. Inuiaqatigiinni kikkuugaluarnersuni pingaaruteqarpoq oqaluttuarisaanermi kingornussarsiat ilisimasaqarfigissallugit – Siuaasat inooriaasiat takorluuinneriaasiallu qanoq ittut inuiaqatigiit Kalaallit kinaassusiannut/ileqquinut ilusilersueqataasimappat, aammalu siunissami qanoq ilisamik sunniuteqartinneqassappat/sunniuteqartinneqarsinnaappat.
Saqqummersitsineq Nanortaliup aammalu Maniitsup katersugaasiviisa pisortaasa – Lasse Meyer aamma Peter Nygaardip piareersarlugillu aaqqissugaraat.