Tyskeq timmisartortartoq Markus Gert Sorgatz, timmisartuaqqaminik 470 kg-nik oqimaatsigisumik Tyskland-imit USA-mut timmisartornissaminik takorluugaqarsimavoq. Silarlulermat Sisimiunut mittariaqalersimavoq, unerisimatsiillunilu sapaatip akunnerini sisamani Sisimiuniissimalluni.
Sisimiuniinnermini tuttumit uummataasiaq pisiarisimavaa. 2016-imi aggustip sisamaani Tyskland-imut tikikkami arnaamminut Sabine Petra von Wülfingen-imut tunniuteriarlugu aperisimavaa: katikkumavinga?
Ukioq ataaseq qaangiummat aappariit Sisimiuliarput, aggustillu sisamaani Assaquttami katillutik. Assaqutaq nunaqarfikuuvoq, Sisimiunit 8 km.-inik ungasitsigivoq, 25 meterinillu takitigisumik ikaartarfeqarnermigut nunamut attaveqalernikuusoq.
Nunaqarfikumi katisitsineq, Hotel Sisimiut-nit aallarnerneqaqqammerluni 'Love in the Arctic' aqqutigalugu ingerlanneqarpoq.
- Ajornassannginnersoq pissanngaatigisimaqaarput. Takornariarpassuit nunami allami katinnissaminnik kissaateqartarput, takornarissallu ilaat qimussertillutik, qaqqap qaavani, Assaquttami imaanilu katissinnaanerlutik aperisarput, taama Hotel Sisimiut-ni pisortaaneq Anette Grønkjær Lings oqarpoq.
Sabrine aamma Markus Sorgatz ulluinnarni Tyskalnd-imi Bayern-imi Kronach-imi najugaqarput.