Apriilimi MIO kommunip illoqarfiinut nunaqarfiinullu angalaarpoq, kommunimilu tamarmi meeqqanik inersimasunillu MIO-p oqaloqatiginninnerinik, nalunaarut aallaaveqarluni. MIO Qeqqata Kommuniani angalasimanera kommunimit iluarisimaarneqarpoq, kommunimimi meeqqat ilisimaneqanngitsut MIO-mit anguneqarmata.
”Meeqqat oqariartuutaat sakkortupput, tusarnaassavavut, kommunillu meerartai inuusuttailu ikiorneqarnissamik pisariaqartitaannik ikiorneqarnissaat anguniagaqartumik sulissutigissallutigu” borgmester Malik Berthelsen oqarpoq.
Meeqqat kinguaassiutitigut innarligaasimasut amerlanertigut pisariaqartitaminnik ikiorneqartarsimanngitsut nalunaarummi taakkartorneqarpoq, paasineqarporlu timikkut tarnikkullu nakuuserneq annertusoq, soorluttaaq meeqqat inuusuttullu arlaqartut ilaqutariinni ikiaroornartumik atornerluffiusuni inuusut arlaqartut. Tamatuma saniatigut ikiaroornartumik tuniniaasarnermik akiuunniarnermut kommunip suliniuteqarnera naammanngitsoq.
Kommunip illoqarfiini nunaqarfiinilu ikiaroornartumik tuniniaasarneq borgmesterimit eqqumaffigineqarpoq,Qeqqata Kommunianilu politiit ataatsimeeqatigeqqammerlugit, ikiaroornartumik tuniniaasarnerup eqqussisarnerullu akiornissaanut akitsuuserisumik atorfinitsitsinissaq pillugu, Namminersorlutik Oqartussanut saaffiginnissummik nassiussisoqarluni.
Suliap ingerlateqqinnissaanut nalunaarusiaq sakkussaasoq pingaarutilik, nalunaarummilu innersuussutaasut kommunimit tigulluarneqassasut, borgmesteri oqarpoq.
Kommunip suleqatiginissaanut MIO neqerooruteqarpoq, tamannalu tigulluarneqarlunilu qutsatigineqarpoq. Tamatuma saniatigut suliassat arlaqarmata oqimaatsuullutillu, isumaginninnikkut sulinermi killiliussat nukittorsarneqartariaqartut ersarippoq. Tamanna ukiup nikinnerani sullissisunik tallimanik atorfinitsitsisoqarnissaanik Kommunalbestyrelsimit politikkikkut missingersuutitigut kissaataareerpoq. Sisamanngorpat Kommunalbestyrelsip ataatsimiinnerani missingersuutitigut kissaat inaarutaasumik akuersissutigineqassaaq.
Suliat akimorlugit suleqatigiinneq nukittorsarniarlugu, Qeqqata Model ineriartortinnissaanut atuutilersinnissaanillu kommuni suliaqarpoq. Suliat akimorlugit suleqatigiinneq nukittooq, siusissukkut iliuuseqarneq kiisalu meeraq qitiutillugu Qeqqata Modelimi aallaaviupput.