Sisimiuni suliffissaaleqisut qulinngiluat novembarip qiteqqunnerani suliffissaminnik pissarsinissaminnik sulileqqinnissaminnullu aqqutissiuunneqarput.
Suliniut Majoriaq-mit aaqqissuussaasoq, peqataasunut kajumissaarisuusoq aqqutissiuussisorlu sapaatit akunnerini pingasuni ingerlanneqarpoq, tassani ilitsersuisoq peqatigalugu assiginngitsunik ilinniarfiulluni, taakku ilagalugit imminut pissusissamik malinnilluarsinnaanermik imminut aqussinnaanermik, imminut pingaartinnermik, imminut ilisaritinnermik aammalu qarasaasamik ilinniartinnermik ilinniartoqarluni, taamaalillutik suliffissamut qinnuteqaammik namminneerlutik suliaqarsinnaaniassammata aammalu suliffeqarfimmut qinnuteqarfigisaminnut namminneerlutik tunniussinnaaniassammassuk.
- Ingerlatsineq nutaapajaajuvoq. Aappassaa ingerlatsivugut, Majoriami suliffissarsiuussisarfimmi siunnersorti ingerlanermilu ilitsersuisuut ilaat, Dorthêrak Kambskard paasissutissiivoq.
Sapaatit akunneri pingasut qaanngiunnerini ingerlatsineq ima inerneqarniartussaavoq, peqataasut sapaatit akunnerini pingasuni sisamaniluunniit suliffimmik misiliissallutik, tassani sulisitsisoq takutinniartussaallugu, suliffimmut qanoq kajumitsigalutik. Suliffimmik misiliinerup naannginnerani, sulisitsisoq suliffimmik misiliisoq peqatigalugu suliffissarsiuussisarfimmik ataatsimeeqateqartussaapput.
- Ataatsimiinnermik siunertaasoq tassaavoq, pineqartup suliffeqarfiullu akornanni piginnaanngorsarnissamik isumaqatigiissummik atsioqatigiinnissaq, tamatumani aalajangersimasumik sulisunngorsinnaalluni imaluunniit ilitsersuisut/suliffissarsiuussarfimmi siunnersorti suleqatigalugu piginnaasanik qaffassaanissaq aallartinneqassalluni, Dorthêrak oqaluttuarpoq ilassutigalugulu, peqataasut ingerlaannartumik iperarneqarneq ajortut, kisianni siumut isigisumik minnerpaamik ukiup affani ilitsersuisunit malinnaavigineqartarlutik.
Imminut ineriartortinneq
Suliffissaaleqisut aqqutissiuunneqarnermik pikkorissarnertik oktobarip 30-ani aallartippaat, aammalu tamakkerlutik suliffissamik misiliiffissarsilerpput.
- Soorunami uagutsinnut ilitsersuisuusunut nuannerpoq takullugu, peqataasut imminut tatiginerulernerat aammalu inuunerminni ingerlaqqinnissamut aamma siunissami imminut pilersortunngornissamut kajumissuseqartut. Aalajaatsuusinnaanertik, pingaartinneqarnertik puigorneqannginnertik ilinniarnikuuaat takutillugulu, Dorthêrak Kambskard oqarpoq.Peqataasut qulingiluaasut ingerlanerup naammassinerani nuannaarlutik ingerlasimanerminnut uppernarsaatitik pissarsiaraat, tassani Qeqqata Kommuniata borgmesteria aamma takkuppoq oqalugiarlunilu.
Maanna piumassuseqarnerulernikuullutik sulileqqissinnaanngorput.
Pikkorissarneq ukioq manna maajimi aallartinneqartoq ingerlaavartumik ingerlanneqartassaaq.