Amernik mersorneq, utoqqaat klubbiat, ilaqutariinnut ulloqartitsineq oqalugiarnerillu. Sarfannguarmiut sammisassaaleqisutut taaneqarsinnaanngillat.
Sunngiffimmi sammisassaqartitsineq ukkataralugu, meeqqanut inuusuttunullu immikkoortortamut aningaasaliissutit ilaasa nuunneqarnerisigut, tamakku piviusunngortinneqarsinnaasimapput.
Siusinnerusukkut aningaasat Sarfannguani ammerivimmut tuttarsimagaluarput. Eqqortumilluni atorneqarneq ajorneri paasisimalerparput. Nunaqarfimmi aqutsisut kissaatigisimavaat, aningaasaliissutit taakku nunaqarfiup meerartaannut inuusuttaannullu atorneqassasut, tassani meeraq qitiutillugu ilaqutariinnik ataatsimoortitsinissaq ukkatarineqarluni, taamak oqarpoq Qeqqata Kommuniani ilinniartitaanermut pisortaq Annga Lynge.
Aningaasat immikkoortumut nuutinneqarnissaanut suliniut 2015-imi aallartisarneqarpoq, ukiullu tullissaani aningaasaliissutit 233.000 koruuninik naleqartut, immikkoortumi suliniuteqarfiusuniitiinnarneqarnissaat aalajangiunneqarluni.
Ingerlalluarsimaqaat. Aningaasaliissutit ammerivimmiit innuttaasunut siammarnerulersinneqarnerat assut nuannaarutigigipput tupinnanngilaq. Matumani annertunerusumik sammisaqartitsisinnaalernitsinnik kinguneqarpoq, taamaalillutalu aamma pinaveersaartitsinissanut aningaasassaqalernerulerlutalu nukissaqarnerulerpugut, Sarfannguani allaffimmi pisortaq Aron Olsen taama oqarpoq.
Nuannarineqarluarput
Ukioq kingulleq sanalunnermik pikkorissaasimaneq immikkut erseqqissaatigineqarpoq. Peqataasut 40-simapput, ilinniartitsinerlu nuannarineqarluinnarsimalluni.
Nunaqarfimmi innuttaasut 120-t missaaniinneri eqqarsaatigigaanni, taamak amerlatigisut soqutiginnissimanerat assut nuannerpoq, Aron oqarpoq.
Tamatuma kingorna sammisassaqartitsinernik assigiinngitsunik ingerlatsisoqarsimavoq. Nammineq ineriartorneq pillugu oqalugiartoqarpoq, sunngiffimmi sammisassat sapaatip akunnerani ulluni arlalinni aalajangersimasumik orninneqartalersimasut arlalinngorsimapput.
Assersuutigalugu utoqqarnut klubbeqarpoq, utoqqaat namminneq angerlarsimaffinniittut siusinaartumillu pensionillit naapisimaarfigisinnaasaat kiisalu namminneq sammisaqaqatigiiffigisinnaasaannik, soorlu mersorneq. Atuarfitsinni nutaami meeqqat kaagiliorput, Sarfannguullu oqaluttuarisaanera pillugu inuusuttut suliniummik annertuumik ingerlataqarput, sapaatip akunneratalu naanerani ilaqutariinnut ulloqartitsisoqartarluni. Ilaqutariinnut ulloqartitsineq ima nuannarineqarluartigaaq, maannakkut katersortarfimmi inissaarulluinnartalerluni. Ulloqartitsisarneq atuarfimmut nuunneqarnissaa eqqarsaatersuutigineqarpoq, Aron oqaluttuarpoq.
Oqaatigaluguttaaq, aningaasaliissutit amerlineqarnerisigut, sammisaqartitsinerit saniatigut meeqqat Sisimiunut cirkus-eriartinneqarsinnaasimallutik. Meeqqanut aamma Assaquttamut aallaarsimaartitsisoqarsimavoq.
Sammisaqartitsinissat arlaqartut allat aamma ingerlanneqartussaapput. Neqerootutit maannakkut pissutsinut naapertuuttunngorlugit allanngorartuunissaat pilersaarutaavoq. Qaammatit pingasukkaarlugit suliniutit nalilersorneqartassapputtaaq.
- Sisimiuni juullimut niuffattoqartussaavoq, uanilu pilersaarutit ilagaat, arlallit amernik mersornermik maannakkut ingerlataqartut, suliarisimasaminnik tuniniaatikkiartorneqassasut. Nereqatigiinnissamik aamma pilersaaruteqarpugut, kalaalimerngit atorlugit nerisassiortoqarluni, taamatullu qissianik, paarnaqullunnik uillullu qaleruaannik sapaassuarnut naneruusiortoqassalluni, Aron oqaluttuarpoq.
Neqeroorutittaaq innuttaasunut arlaannik patsiseqartumik suliffeqanngitsunut suliaqarnermik suliaqarsinnaanermillu misigisaqartitsissallutik.
Siuariarneq pitsaasoq
Suliniutaasut saniatigut allatigut aamma pitsanngorsaasoqarsinnaasimavoq.
- Allaffimmiut tiimii marlunnut avillugit, Pitsaaliuinermik ataqatigiissaarisumik sulisoqalerpugut, ullup affaa allaffimmi suleriarluni, ullup sinnerani ataqatigiissaarisutut assersuutigalugu sammisaqartitsinernik ingerlanneqartunik assigiinngitsunik alakkarterisinnaasarluni, Aron oqaluttuarpoq.
Aningaasat nunaqarfimmi innuttaasunut atorneqalerneri Aron Olsen-imit assut iluarisimaarineqarpoq, namminerlu oqaatigaa, pitsaasumik siuariartoqarnera pilluaatigalugu, minnerunngitsumik aanngajaarniutinik atornerluisarneq eqqarsaatigalugu.
- Illoqarfiit nunaqarfiillu allat assigalugit, imigassamik hash-imillu atornerluisarnermik aamma ajornartorsiuteqarpugut. Pinaveersaartitsinissaq siunertaralugu atuagaaqqanik pissarsisimavugut, taakkulu assigiinngitsunut inissitsiterneqarlutik. Atornerluinermik allanilluunniit ajornartorsiutit pillugit ammasumik oqaloqatiginnittarnissamik kaammattuiuarpugut, Aron oqarpoq.
Arlalinnik sammisassaqartitsinerup atornerluinerullu annikinnerulernerata ataqatigiilluinnarneri takuneqarsinnaasimavoq.
- Imigassat piniarneqartartut Sarfannguanullu anngunneqartartut appariaateqarsimapput, siusinnerusukkuttaaq sodavandit puukui hashimik ikiaroornermut atorneqartarsimasunik nassaarsinnaasarnikuuvugut. Tamanna maannakkut qaqutiguulernikuuvoq. Sarfannguani maannakkut pissutsit qanoq ingerlaneri nuannaarutigalugillu iluarisimaarluinnarpakka. Sammisassaqartitsinerulernerit atornerluinerup annikinnerulerneranik kinguneqartitsisut ersarilluinnarpoq, Aron erseqqissaavoq.
Qeqqatami Ilinniartitaanermut pisortap Annga Lynge-p aamma tamanna nuannaarutigaa.
- Suliniutit taamatut pitsaasumik inerneqaraangata nuannertuaannarpoq. Aningaasat meeqqanut inuusuttunullu immikkoortortamut nuunneqarnerat isumassarsiatsialaavoq, taakkuuppummi pingaaruteqarnerusut. Ineriartornissaminnik periarfissaqartussaapput, sammisassaqartussaapput toqqissisimasussaallutillu, Annga naggasiivoq.