Qeqqata Kommuniani attaveqaatit ineriartortinneqarnissaasa unittooqqanera, Qeqqata Kommuniani kommunalbestyrelsip annertuumik ernumanartoqartippaa. Inuutissarsiutit ineriartortinneqarnissaat unikaallatsinneqassaaq, takornarialerisullu ineriartortitsinissamik pilersaarutiminnik aallartitsisinnaanatik. Sisimiut Kangerlussuullu akornanni nunataq, UNESCO-p nunarsuarmioqatigiinnut kingornussassanngortitaannut ilanngunneqassasoq aamma naatsorsuutigineqarpoq, nunarsuarmioqatigiinnulli kingornussassanngortinneqartup tikikkuminaannera pillugu nunaqavissut takornarissallu misigisaqarfigisinnaassanngilaat, aqqusineqaraluarpammi misigisaqarfigisinnaassagaluaramikku.
Kommunini allani attaveqaqatigiinnikkut suliniutinik Naalakkersuisut immikkut samminninniinnaratik, nunatta nukissaanik assigiinnerusumik agguataarinissamik Naalakkersuisut immikkut sammisaqarnerinik Qeqqata Kommuniani innuttaasut upperinninnissaannut aamma pingaaruteqarpoq. Namminersorlutik Oqartussat mittarfiliassat annertuumik sammisarigaat, pilersaarutillu taakku arlaannaalluunniit Qeqqata Kommunianiinngitsoq isertuunneqarsinnanngilaq, taamaattumik Kangerlussuup Sisimiullu akornanni aqqusinniassamut attaveqaatitigut pilersaarutinut tunngatillugu Naalakkersuisut iliuuseqarnissaat kissaatigaarput!
ATV-nut aqqusiortoqarnissaanut Qeqqata Kommuniani kommunalbestyrelsi aningaasanik immikkoortitsinikuuvoq, tassungalu atatillugu ATV-nut aqqusiassaq Kangerlussuarmit Kangerluarsuk Tulleq-up tungaanut aasamut aallartinneqassasoq kissaatigalugu. Kangerlussuup Kangerluarsuk Tulleq-llu akornanni aqqusinniortoqarsinnaappat, takornarissat Kangerlussuarmit UNESCO-p nunarsuarmioqatigiinnut kingornussassanngortitaannukarsinnaalissapput, soorluttaaq takornarissanit takusassaqqissut allat, soorlu Pingu-mi qaqqarsuit Aqqutikitsorlu tikinneqarsinnaalissasut. Kingullertut minnerunngitsumillu Kangerluarsuk Tulleq-up qinnguani illuararpassuit Sisimiunit Sisimiunullu angallammik tikinneqariaannaasut, Kangerlussuarmut aqqutissaqalissagaluarput.
Sisimiuni imeqarfimmut tunngatillugu aaqqiissutissarsiornissami avatangiisinut sunniutaasinnaasut pillugit naliliinissaq akimmiffiginagu aasamut Kangerlussuup Kangerluarsuk Tulleq-ullu akornanni, taamaalillunilu Kangerluarsuk Tulleq-up Sisimiullu akornanni aqqusinniortoqarsinnaaqqullugu Qeqqata Kommunia sinnerlugu Naalakkersuisut qinnuigaakka, avatangiisinut sunniutaasinnaasut pillugit nalilersuinissaq aaqqiissutissarsiorfigeqqullugu.
Sisimiut Kangerlussuullu akornanni asfaltigaanani aqqusinissamut tunngatillugu suliassap nassuiaataa, Naalakkersuisunit atsiorneqarnissaa Qeqqata Kommuniata aamma qilanaaraa, suliassammi nassuiaataa pigineqartillugu aqqusineq asfaltigaanngitsup piviusunngortinneqarnissaanut suliaq ingerlateqqqinneqarsinnaalissammat.
Borgmesteri Malik Berthelsen oqarpoq: ATV-nut aqqutissap, Kangerlussuup Sisimiullu akornanni asfaltigaanani aqqusinissap, minnerunngitsumillu Kangerlussuarmi Aqqutikitsumilu periarfissat piviusunngortinneqarnissaannut pilersaarutit Inatsisartunut Naalakkersuisunullu saqqummiutissallugit piareersimavunga.