2016-2017-imi alloriarfinni misilitsinnerni inernerit
Atuartut 3. klassimi 7. klassimilu alloriarfinni misilitsinnerni inernernik pitsaassutsimut nalunaarut imaqarpoq. Inernerit takutippaat, 3. klassimi kalaallisut qallunaatullu kommunip atuarfiini angusaqarfiulluartoq. Kalaallisoornermi, qallunaatoornermi tuluttoornermilu kommunimi 7. klassit nuna tamakkerlugu agguaqatigiisitsineq qaanngeqqagaluaraat, matematikkimi appasinnerulaannguartumik inissimapput.
Kommunip atuarfiini oqaatsitsigut ajorpallaanngitsumik ingerlasoqartoq kisitsisit takutippaat. Ukiuni kingullerni marlussunni kommunimi oqaatsitigut suliniuteqarsimaneranut tamanna patsiseqarsinnaavoq, ilaatigut 1. klassimi atuartunut tuluttoortitsisarneq eqqunneqarnikuulluni.
Meeqqat atuarfiani atuartitsisarnerup nukittorsarnissaa kommunalbestyrelsimit nutaamit kissaatigineqarpoq, ilaatigut iPadsit atorlugit aammalu paarlaaqatigiilluni angalanikkut oqaatsitigut piginnaanngorsarnikkut, aammali atuartitsissutinut arlalitsigut ilinniartitsisut piginnaasaannik pikkorissaanikkut nukittorsaanikkut.
Nukarlerni akullernilu matematikkimik atuartitsisarneq nukittorsarneqartariaqartoq, inernerit aamma takutippaat.
2016-2017-imi soraarummeerluni misilitsinnerit
10. klassimi soraarummeerluni misilitsinnerit inernerittaaq pillugit, pitsaassutsimut nalunaarummi paasissutissanik imaqarpoq. Kalaallisut kiisalu qallunaatut oqaluttariarsorneq ajunngitsumik inissisimavoq, qallunaatulli kommuni allattariarsornermi pisinnaasatigullu nuna tamakkerlugu agguaqatigiisitsineq ataallugu inissisimavoq. Tuluttoortitsinermi kommuni allattariarsornikkut pisinnaasatigullu nuna tamakkerlugu agguaqatigiisitsineq qulaallugu inissimavoq. Matematikkimi kommuni nuna tamakkerlugu agguaqatigiisitsineq qulaallugu inissisimavoq kiisalu pinngortitalerinermi, uumassusilerinermi nunalerinermilu, ukiup siulianut sanilliullugu inernerit siuariaateqarput.
Inuiaqatigiilerinermi upperisalerinermilu 2016-imut sanilliullugu annertuumik appariaateqarpoq. Projektiliornermi atuartut namminneq suna sammissanerlugu toqqaallutik suliaqartarnerini, pitsaasumik siuariaateqartoqartoq takusinnaavarput, tassanilu nuna tamakkerlugu agguaqatigiisitsineq qulaallugu inissisimalluta.
Atuarfiit ataasiakkaarlugit qiviaraanni, atuarfinni ataasiakkaani pitsaalluinnartunik angusaqarfiupput. Atuartitsissutini tamani Nalunnguarfiup Atuarfia aamma Kangerlussuarmi Qinnguata atuarfia nuna tamakkerlugu agguaqatigiisitsineq qulaallugu inissisimapput.
Atuartitsineq Sulinngitsoorneq/atuanngitsoornerlu
Ilinniartitsisut sulinngitsoortarnerat atuartullu atuanngitsoortarnerat, inernernut annertuumik sunniuteqartut ilagaat. Akunnerit atuartitsiviusussatut pilersaaruteqarfiusuni, ilinniartitsisussavinnit ingerlanneqartarneranut atatillugu, tamanna atuarfimmiit atuarfimmut assigiinngillat. Atuarfinni ataasiakkaani akunnerni atuartitsiviusuni annerpaamik vikareqartartoqartarpoq, tamanna pitsaanngilluinnartuulluni.
Atuartut atuanngitsoortarneranut atatillugu, illoqarfinni atuarfiusuni pingasuusuni 9. aamma 10. klassini atuartuni annertuumik akuersissutitaqanngitsumik atuanngitsoortarnerit annertungaatsiarpoq. Ilinniartitsisut sulinngitsoortarnerinut aammali atuartut atuanngitsoortarnerinut atatillugu, 2018-imi sulinngitsoortarneq/atuanngitsoortarneq kommunimit sammineqarniarpoq. Atuartut atuanngitsoortarnerisa appartinneqarnissaannut angajoqqaat tapersersuinissaat pingaaruteqarluinnartuummat, angajoqqaanik pitsaasumik suleqateqarnissaq pisariaqarpoq.
Ilinniarneq ilinniagassatullu qinikkat
Qeqqata Kommuniani meeqqat atuarfiini ilinniartitsisut ilinniarsimasut arlaqarput, atuarfiilli ataasiakkaat ilinniartitsisunik ilinniarsimasunik sulilersitsinissaminnik ajornartorsiorput.
Ilinniartitsisut ilinniartitsissutissatut toqqakkaminnik amerlanerit atuartitsisarput, tassaallutik kalaallisut matematikkilu, qallunaatut pinngortitalerinermillu ilinniartitsissutissatut toqqaasimasut ikittuinnaapput. Ilinniartitsisut ilinniartitsissutissatut toqqakkaminnik piginnaasallit pitsaanerusumik atuinissamik sammisaqarnerulernikuupput, taamatullu atuartitsissutini ilinniartitsisut ilinniartitsissutissaminnik toqqaasimasunik amigaatiminnik atorfinitsitsinissamik. Meeqqat atuarfiini atuartitsinerup pitsaanerulernissaanut tamanna aqqutissaassasoq neriutigineqarpoq.
Aningaasartuutissat
Nunaqarfimmi atuarfimmi kiisalu illoqarfimmi atuarfimmi atuartumik atuartitsinermi qanoq annertutigisumik aningaasartuuteqartarnera assigiinngillat, atuarfiilli angissutsiminnut assingugaluarlutik aamma assigiinngissutseqarput. Tamanna meeqqat atuarfiani nukissanik assigiinnerusumik agguaassinissamik atuutilersitsinikkut kommunip anguniarpaa, ilaatigut atuartut klassillu amerlassusaat tunngavigalugit, atuarfiit ataasiakkaat aningaasaliissutinik qanoq annertutigisunik pisinnaatitaanersut naatsorsuisussaq. Meeqqat atuarfiani nukissanik assigiinnerusumik agguaassinissaq 2018-imi ukiup affaata siullermi naammassineqarnissaa, allaffeqarfimmit naatsorsuutigineqarpoq.
Pitsaassutsimut nalunaarutit
Atuarfimmi aqutsisut ukiut tamaasa kommunalbestyrelsimut pitsaassutsimut nalunaarusiortarnissaat 2012-imili inatsisitigut piumasaqaataalernikuuvoq . Atuarfiit pitsaassutsimut nalunaarutaat atuarfimmut tunngasunik paasissutissanik assigiinngitsunik imaqarpoq, ilaatigut ukiumi atuarfiusumi alloriarfinni misilitsinnerit, soraarummeernermi misilitsinnerit inerneri, iliuusissatut pilersaarutit, klassimi atuartut agguaqatigiisinneri, atuartitsinissamut akunnernik, napparsimalluni sulinngitsoornernik/atuanngitsoornernik kiisalu vikarinut akunnerit atorneqartunik ilaqarlutik.
Meeqqat atuarfiinik kommunalbestyrelsi atuarfiit ataasiakkaat inatsimmik, politikkikkullu anguniakkanik naammassinninnerinik nakkutilliisinnaaneranik pitsaassutsimut nalunaarusiaq periarfissiivoq. Tamatuma saniatigut pitsaassutsimut nalunaarusiaq kommunimi atuarfinni assigiinngitsuni sanilliussisinnaanermut atorneqarsinnaavoq. Atuarfeqarfiit pitsaassusaanut ammanerulersitsinissamut nalunaarusiaq ilaassaaq, meeqqat atuarfiinik allannguinissamut pitsanngorsaanissamullu tamanna piumasaqaataavoq.
Kommuni meeqqat atuarfiinut kommunalbestyrelsi pingaarnertut akisussaasuuvoq, kommunalbestyrelsillu atuarfinnik nakkutilliiartorluni pulaarnerani pitsaassutsimut nalunaarusiaq tunngavittut atorneqartarluni.