Teknologiimik ilinniarfiit Sisimiuni katersuunneqarnerisigut, ilinniarfiit taakku sunniivigeqatigiissinnaalissapput.
Sisimiuni KTI-mut / Tech Colle Greenland-imut atalersinneqarneratigut, assassortunngorniarluni ilinniartut, Aatsitassalerinermik Ilinniarfimmut, DTU-llu ataani Issittumi ingeniørinngorniarfimmi ilinniartitsisunut ilinniartunullu allanut attaveqarsinnaalernermikkut ilinniartunut atugassarititaasut pitsaanerulissapput.
Sisimiuni teknologimik ineriartortitsineq taanna aamma Saviminilerinermik Ilinniarfimmi ilinniartitsisunut iluaqutaassaaq. Saviminilerinermik Ilinniarfimmi ilinniartitsisut Sisimiunut nooqataappata, Saviminilerinermik Ilinniarfimmi ilinniartitsisut ukiorpassuarni misilittagaat, KTI-p / Tech College Greenland-ip sinneranut kivitseqataasumik aamma pingaaruteqassapput.
Taamaattumik Malik Berthelsen-ip neriuutigaa, Saviminilerinermik Ilinniarfimmi ilinniartitsisut sapinngisamik amerlanerpaartaat Sisimiunut nooqataassasut.
Malik Berthelsen-ip naatsorsuutigaa, Sisimiuni sunngiffimmi periarfissarpassuatsialaat, Qeqqata Kommuniani meeqqerivinni akigititat appasinnerat, meeqqat atuarfiatalu ineriartortinneqartuarnera kiisalu nunap immikkoortortaani ineriartortitsinissamik suliniuterpaaluit orniginarsaatigalugit ilinniartitsisorpaaluit Sisimiunut nuukkumaassasut.
Sisimiuni ilinniartitsisunut ilinniartunullu inissat pitsaasut qulakkeerniarlugit, Qeqqata Kommuniata Ilinniartitaanermut Naalakkersuisoqarfik qaminut suleqatigalugu aallartippoq. Soorunalimi aamma Sisimiut qiterpasissortaani ilinniartoqarfinnut atalersillugu, Saviminilerinermik Ilinniarfissap nutaassap ullutsinnut naleqquttumik pilersaarusiorneqarnissaa.