Tunuliaqutaa
Maniitsup avannaatungaani Sermersuarmi sisorartitsilluni
takornariartitsisarnissamut akuersissuteqartarnissaq periarfissinniarlugu
Kommunip pilersaarusiorfigineqarneranut tapiliussaq una suliarineqarpoq.
Takornariartitsinermut akuersissuteqartarnissaq pillugu inatsit 2012-
imeersoq, kingornalu 2015-ip upernaani tapiliussatut inatsit naapertorlugu,
akuersissutit tunniunneqartassapput.
Inatsimmi piumasaqaataavoq, Kommunip pilersaarusiorfigineqarneranut
systemimi akuersissuteqarnissamut periarfissanik pilersitsiviusinnaasumik
kommunip pilersaarusiorfigineqarneranut tapiliussamik sanasoqassasoq.
Nunap assingani tullinnguuttumi kiisalu nunap assinga ilanngussaq 2-mi
nunatani takuneqarsinnaasuni sisorartitsilluni takornariartitsisinnaanermut,
Kommunip pilersaarusiorfigineqarneranut tapiliussaq periarfissiissaaq.
Takornariartitsisartunut akuersissutinik nalunaaruteqarneq ima
paasineqassaaq, immikkoortumi pineqartumi takornariartitsisartut allat
qinnuteqarsinnaanatillu ingerlatsisinnaanngillat. Akuersissulli imaanngilaq
immikkoortuni allatigut sammisaqartitsinernik ingerlatseqqusaanngitsoq.
Taamaalilluni allatigut takornariartitsinerit, piniarnerit assigisaanillu
ingerlatsisoqarsinnaavoq. Soorluttaaq nunaqavissut ajornaquteqanngitsumik
immikkoortuni sisorarsinnaatitaallutillu eqalunniarsinnaatitaasut.
Sisorartitsilluni takornariartitsinerup ineriartortinneqarnissaanut pitsaanerpaamik
killilersorneqarnerata qulakkeerneqarnissaa, Qeqqata kommunalbestyrelsimit
pingaartinneqarpoq, tamatumalu saniatigut kommunimi tamarmi
takornariaqarnikkut ataatsimut ineriartortitsinermut tapertaassallutik. Tassa
imaappoq, neqeroortitsinermi illuaqqanik/unnuisarfinnik pilersitsinissaq
pingaartinneqassasoq, taamaalilluni ukiup ilaani takornarissanik allatut
sammisaqartitsinermi atorneqarsinnaasunik, tammajuitsussarsititsiniarluni
piniarnermiusinnaavoq – qissattarluni eqalunniartitsiviusinnaavoq imaluunniit
pinngortitami imaannaanngitsumi sukisaarsaartitsilluni takornariartitsinermi.
Ullumikkut immikkoortup pilersaarusiorfigineqarnera
Nunatat immikkoortinneqartut inuilaatut inissisimapput, ullumikkullu
annertunerusumik sammisaqartitsinernut atorneqaratik. Nunatani
qutsinnerumaartuni sisorartitsilluni takornariartitsinissamut immikkut
soqutiginartuni, ullumikkut ilisimaneqartunik sammisaqartitsisoqanngilaq.
Nunatami ukiuni arlalinni Maniitsumiit Kangaamiuniillu aallaaveqartumik
qulimiguulik atorlugu sisorartitsisarnerit ingerlanneqartarput.
Tamatuma saniatigut umiarsuaaqqanit takornariartitsinerni angallassisulerluni
sisorartitsisarnerit ukiuni kingullerni ingerlatsisoqartarlersimavoq.
Illoqarfiit nunaqarfiillu avataani nunatani atortulersuutit killeqarneri
ilisarnaataavoq.
Maniitsup avannaatungaani avannaata-kangiatungaani Sermersuaq, kitaanit –
kujataata-kitaanit silaannaap isugutattup ingerlaarneranut akimmiffiuvoq,
taamaalillunilu silaannaq isugutattoq quassukkut anorimit
ingerlaartinneqarneratigut nunatami annertuumik nittaattarpoq/siallertarpoq.
Uani Kommunip pilersaarusiorfigineqarneranut tapiliussaq nr. 30 tamaat aasinnaavat
