Qeqqata Kommunia uani sapaatip akunnerani ulloq ataaseq sammisaqartitsivoq qulequtsikkaminik "Qeqqata Kommuniani meeqqat inuunerissut", tassa 2017-mi oktobarimi MIO'p angalanerminit nalunaarusiamini innersuussutigisai tunngavigalugit.
"Qeqqata Kommunia, Naalagaaffiit Peqatigiit Meeqqat pillugit Isumaqatigiissutaata malinneqarnissaanut sulinermi maligassiuivoq. Kommunip qulakkeerusuppaa meeqqat tamarmik peroriartornerminni pitsaasumik atugaqarnissaat, pisariaqartitatik pisinnaatitaaffitillu malillugit paaqqutarineqarlutillu illersorneqartutut misigalutik. Kommunip sulinermini meeqqat pisinnaatitaaffiinut tunngasut tamakkiisumik eqqumaffigaat", Meeqqat Illersuisuat Aviâja Egede Lynge oqarpoq.
Meeqqap illersorneqarnissaata saniatigut meeqqat pisariaqartitsisut ikiorneqarnissaasa qulakkeerneqarnissaata saniatigut aamma Qeqqata Kommuniata Naalagaaffiit Peqatigiit meeqqanut isumaqatigiissutaanni artikkilinik eqqortitsinissani kissaatigaa.
"Meeqqat pisinnaatitaaffii eqqartorneqaraangamik ulluinnarni meeqqat inuuniarnermikkut ikiorneqarnissaminnik pisariqartitsisunut tunngasuinnarnullusooq killeqartinniarneqartarput. Qeqqata Kommuniata isumaginiarpaattaaq Naalagaaffiit Peqatigiit isumaqatigiissutaanni artikkilit eqqortinnissaat, taakkununnga ilaatinneqarlutik meeqqat sunngiffimminni sammisaqarnissaannik sumiiffissaqarnissaannillu neqeroorfigineqarnissaat, angajoqqaat akisussaaffeqarnerat aammalu meeqqap perorsarneqarnissaminut pisinnaatitaaffiinut tunngasut", Aviâja Egede Lynge oqarpoq.
Qeqqata Kommuniata immikkut qulequtserlugu sammisaqartitsineranut MIO peqataavoq tassanilu Meeqqat Illersuisuata Aviâja Egede Lynge'p Borgmester Malik Berthelsen Meeqqanut ambassadøritut aallartitanngortippaa. Malik Berthelsen, meeqqanut inuusuttunullu pisinnaatitaaffiit malillugit suliniartuuvoq, tassa Naalagaaffiit Peqatigiit Meeqqat Pillugit Isumaqatigiissutaat malillugit suliniuteqartuummat taamatut toqqarneqarpoq.
"Malik Berthelsen'ip ulluinnarni sulinermini pimoorussilluni meeqqat inuusuttullu - inuit allat naligalugit - immikkoortinneqarnatik assigiimmik pisinnaatitaaffeqartut kiffaanngissuseqartullu takutittarpaa. Malik Berthelsen'ip Qeqqata Kommuniani meeqqat inuusuttullu ineriartornissaannut peqqinnissaannullu akisussaaffeqarnini tiguvaa", Meeqqat Illersuisuat Aviâja Egede Lynge taamatut tunngavilersuivoq.
Qeqqata Kommunia, MIO-p 2015-miilli kommunet tikeraagaasa sisamaraat. MIO kommunep tikissimasai allat ukuupput Qaasuitsup Kommunia, Kommuni Kujalleq aammalu Kommuneqarfik Sermersooq.