Qeqqata Kommunia KNR-ituulli Deloitte-p mittarfissuit nutaat pillugit inuiaqatigiinnut aningaasaqarnikkut kingunerisinnaasai pillugit kiisami nalunaarusiamut takunnittussaatitaanermik pissarsisimavoq. Qeqqata Kommunia nalunaarummut nersualaarutissaqarlunilu uparuagassaqarpoq.
Borgmesterip Malik Berthelsen-ip nuannaarutigaa Deloitte-p Kangerlussuup mittarfiata 2830 meterisut takitigisup nutarterneqarnissaa taamaallaat 199 mio. koruuneqassasoq naatsorsorsimammagu. Tamanna Namminersorlutik Oqartussat 2015-imi namminneerlutik 1,5 mia koruuninut naatsorsorsimasaannit piviusorsiorpalaarnerujussuuvoq. Malitsigisaanik Namminersorlutik Oqartussat siunnersuisartoqatigiinniit SWECO-miit nunat tamakkerlugit paasisimasaqarluartut ikiortigalugit mittarfik ajunngitsoq asfalterneqartariaqaannartorlu paasisimagaat nuannerpoq.
Illuatungaanilli 2.830 meterisut takitigisumik mittarfeqarnikkut inissianik pilersuiffinnillu nutarterinissamut aningaasartuutissat qaffasissusaat 695 mio. koruuninut naatsorsorneqarsimanerat, Qeqqata Kommuniani borgmesterimit ajuusaarutigineqarpoq. Akerlianillu mittarfik 1.199 meteriuppat, inissiat pilersuiffiillu nutarterneqarnissaannut annerpaamik 200 mio. koruuninik naleqartussatut isikkoqarpoq. Namminersorlutik Oqartussanit qallerlugu titarneqarsimammat, kisitsit eqqoqqissaartoq takuneqarsinnaanngilaq.
- Sooq taamatut assigiinngissuteqartoqarnersoq Qeqqata Kommunianiit paasisinnaanngilarput, Malik Berthelsen paasititsivoq.
- Mittarfik 2.830 meteriuppat imaluunniit 1.199 meteriupat qanorluunniit pilersuiviit nutarterneqartussaapput. Inissiat amerlanerittaaq nutartigassaapput, taamaammat qanoq ililluni Kangerlussuarmi inissianik pilersuivinnillu mittarfiup naalineratigut 500 mio. koruunit missaanik sipaarutigineqarsinnaanersut assorsuaq eqqumiippoq. Immaqa Namminersorlutik Oqartussani atorfilittat taakku naatsorsornissaannut nunat tamakkerlugit paasisimasalinnit arlaannaannut attuumassuteqanngitsunit aamma ikiorneqartariaqaraluarput.
- Periarfissat taakku marluk akornanni taamaallaat ukiumut 8 mio koruunit assigiinngissutaasimappata, taava isumatusaarnerup - Deloitte-p nalunaarutaa kisiat pinnagu - Kangerlussuarmi mittarfiup 2.830 meterisut takitigisip piutiinnarnissaa aningaasaqarnikkut iluatinnarnerusoq takutippaa.