Meeqqat atuarfiini suliniutit
Siorna qinersereernerup kingorna politikki nutaaq, suliniutillu Qeqqata Kommuniani kommunalbestyrelsip nutaap atuutsilersinniarlugit suliaqaleruttorpoq. Pilersaarusiornermi periusissiaq nutaaq suliarineqarpoq, meeqqallu atuarfiini suliniarfiit Ilinniartitaanermut, Peqqinnermut, Sunngiffimmi sammisanut Kultureqarnermullu ataatsimiititaliap 2018-imi marsip 26-ai ataatsimiinnerani nutarterneqarlutik.
Ukiuni tulliuttuni suliqarfiit sisamat tulliuttut sulissutigineqassasut ataatsimiititaliap aalajangerpaa: 1) Atuarfimmut ataqqinninneq ataqqeqatigiinnerlu, 2) Atuarfiup angerlarsimaffiullu suleqatigiinnerinik nukittorsaaneq, 3) Atuartitsinermik ineriartortitsineq, 4) Oqaatsit, Nunanullu assigiinngitsunut akuulersitsineq. Qulequttani sisamaasuni arlalinnik assigiinngitsunik suliniuteqarpoq, taakkulu Qeqqata Kommuniani ukiuni tulliuttuni meeqqat atuarfiinik ineriartortitseqataassallutik.
Ataatsimiititaliap ilanngullugu ersarissarpaa, meeqqat atuarfiini suut anguniagarinerlutigit ersittuunissaat pingaaruteqartoq, taamaattumillu suliniuteqarfinni sisamaasutigut sammisaqartitsinerit assigiinngitsut aallartisarneqartut pillugit, kommuni ataavartumik paasissutissiisarniarpoq.
Atuarfimmut ataqqinninneq ataqqeqatigiinnerlu
Meeqqat atuarfiat orniginartunngortinniarlugu angusarissaarfinngortinniarlugulu, suliniuteqarfissami siullermi meeqqat atuarfiinik immitsinnullu isiginnittaatsitsinnik allannguinissaq siunertaavoq.
Tamannalu immitsinnut, atuarfik angajoqqaallu, piumasaqaateqarfiginitsigut anguneqarsinnaavoq. Atuartut ilinniartitsisullu akornanni atuanngitsoortarneq/sulinngitsoortarneq apparsarneqassaaq. Taamatullu atuarfiup, angajoqqaat atuartullu suleqatigiiffigisassaannik imminnullu piumasaqaateqarfigisassaannik, ilinniagaqarnikkut kulturimik pitsaanerusumik pilersitsisoqassalluni. Atuarfinni aqutsisut atuarfinnik pitsaanerusumik aqutsisinnaanissaat anguniarlugu nukittorsarneqassapput. Meeqqat atuarfiini ingerlalluarlutik maligassiuisut aallunneqassapput, kajumissaatinillu akissarsitinneqartassallutik. Intranet aqqutigalugu angajoqqaat meeqqami atuarneranik malinnaasinnaanissaat pisariillisarneqassaaq.
Atuarfiup angerlarsimaffiullu suleqatigiinnerinik nukittorsaaneq:
Meeqqat atuarnerannut angerlarsimaffik pingaaruteqarmat, angajoqqaat atuarfiullu suleqatigiinnerat nukittorsarluartuarniarparput. Ajornartorsiortoqartilluguli angerlarsimaffik taamaallaat attavigineqarani, oqaloqatiginnittarnerup tapersersuisumik akuersaartumillu ingerlanneqartarnissaa pingaaruteqarpoq. Illuatungaatigut atuarfik angajoqqaanut ammanerutinniarparput, taamaalillutalu meeqqat atuarnerinik malinnaanissamik piumassuseqarnerulersitsissalluta. Ilaatigut angajoqqaanut intra pitsanngorsarneqarneratigut kiisalu angajoqqaanut ataatsimoorussamik aaqqissuussinerit amerlineratigut ingerlanneqarsinnaalluni. Atuartunullu angajoqqaanullu pisariaqartitsisunut aamma tapersersuissaagut, tamannalu tunngavigalugu ilaqutariinnut klassit ingerlatiinnarneqassapput, nutaatullu isumaginninnermi siunnersortit illoqarfinni atuarfinnut pingasuusunut ornigullutik atuartunik oqaloqatiginnittassallutik.
Atuartitsinermik ineriartortitsineq
Kommunimi meeqqat atuarfiini atuartitsineq, atuartut ataasiakkaat pisariaqartitaanut naleqqussarsimanissaa kissaatigaarput. Atuartut nutaaliorsinnaanerat nukittorsarusupparput, taamaalillutik isumassarsiamiit nioqqutinngortitsisinnaanermut ineriartortitsisinnaalersillugit. Atuartitsinermi iPad-it atorneqarnissaat suli sulissutiginiarparput, siunissamilu meeqqat atuarfiinut inuussutissarsiortut akuunerulersillugit.
Oqaatsit, nunanullu assigiinngitsunut akuulersitsineq
Atuartut oqaatsinik piginnaasaasa nukittorsartuarnissaat suli sulissutiginiarparput, taamatullu aamma atuartut Kalaallit Nunaata avataani nunarsuarmut isiginnittaasiat annertusarniarlutigu. Tamanna ilinniartitsisut piginnaasaannik qaffassaanikkut ingerlanneqassaaq. Nunaqarfinni internet atorlugu tuluttut atuartitsisarneq nukittorsarusupparput, atuartullu nunanit allanit atuartunik suleqateqarnissaat, taamatullu imminnut tikeraarsinnaanerinut suliniutitigut tapersersorusullutigit. Canada-mi Nunavut-mit klassit suleqatiginissaat piukkunnaatilerujussuuvoq. Tassunga atatillugu atuartut, klassillu nunat eqqaamiorisanut paarlaasseqatigiilluni angalasarnissaat pingaaruteqarput.
Annertunerusumik paasissutissat:
Evelyn Frederiksen
Ilinniartitaanermut, Peqqinnermut, Sunngiffimmi sammisanut Kultureqarnermullu ataatsimiititaliami siulittaasoq
Tlf. 525955