Sarfannguani perlerortoqartoq paasineqarpoq. Qimmit nunaqarfiliaateqqusaanngillat. Qimmit nunaqarfimmit angalaniarnermi nassarneqaqqusaanngillat. Tamanna minnerpaamik juunip aallaqqaataata tungaanut atuupput. Imaassinnaavoq sivitsorneqartoq.
Nunaqarfimmi qimmit teriannissallu, perlerornermik ilisarnaateqarnersut alaatsinaanneqassapput. Perlerornermut ilisarnaataasinnaasut: Qappiorneq, nipaata allanngornera, iisiniapiloortarneq, toqqissisimannginneq, pissusilersornerata pissusissamisuunnginnera soorlu piviusuusaartitanik kiiseriaqattaarneq, nujoqqanneq, paatsiveqanngitsumik pissusilersorneq, soqqusaatsuliorneq sorusussuseqannginnermik akunnilerneqartartoq, sassusserusunneq kiisalu pingaartumik alleruisa kingulliivisalu tamakkiisumik ilaannakuusumilluunniit nukillaarnerat.