Qeqqata Kommuniani inuutissarsiutitigut siunnersuisoqatigiinni Arctic Circle Business-imi (ACB) siulittaasup tullia Henrik Sachse, Sisimiunilu GE-mi siulittaasup tullia Miki Brandt, Qeqqata Kommuniani borgmester Malik Berthelsen-ip tallimanngormat ataatsimeeqatigai. Kangerlussuami mittarfimmik Qeqqata Kommuniata tigusinissaa tapersersorniarlugu, Kangerlussuarmilu periarfissarpassuit siuarsarneqarnissaat pillugu assammissutigaat. Mittarfik taamak ingerlalluartigisup naalisinneqarnissaa imaluunniit matuinnarneqarnissaa pillugu Kangerlussuaq nunallu immikkoortortaa qulaatiinnarlugit, aalajangiisussallu nunap immikkoortortaanit taamak ungasitsigalutik aalajangiiniarnerat illuatungeriit paasiuminaatsippaat.
- Kalaallit Nunaanni nunaqarfiit ingerlalluartut nuunneqaraangata matuneqaraangataluunniit kinguneqarluarneq ajunngisaannarpoq. Naalagaaffiup Naalakkersuisulluunniit suliassaq artorpassuk, taava uagut Qeqqata Kommunianiit tigusariaqarparput, illuatungeriit pingasuullutik taama oqarput.
Naalakkersuisut tungaanniit qulakkeerinertaqanngitsumik naapertuilluartumik unammilleqatigiinneq
Kangerlussuarmi mittarfiup, Nuummilu mittarfiup tallineqarnissaata akornanni naapertuilluartumik unammilleqatigiinnissaq illuatungeriit qilanaaraat. Naapertuilluartumik unammilleqatigiinnermi, mittarfiit assigiinnik periarfissaqartariaqarput. Mittarfiit nunap immikkoortortaanni aktianik piginneqatigiiffinngortinneqarnissaat aaqqiissutissaqqippoq. Siuarsaanissami suliniutissanut Namminersorlutik Oqartussanit tamarmik qulakkeerinnissutaannginnissaat aamma taamak kajuminnartigaaq.
- Qeqqata Kommunia talittarfittaaminik nammineq akiliisariaqarnikuusoq, Sikuki Harbour Namminersorlutik Oqartussanit pilersinneqartoq ajoraluartumik misiginikuuarput. Ilanngullugu nunatsinni innuttaasut tamarmik Sikuki Harbour akilertussaavaat. Tamanna naapertuilluartumik unammilleqatigiinnerunngilaq, Nuummilu mittarfiup tallineqarnissaani taamak pisoqaqqittariaqanngilaq, taamak Arctic Circle Business-imi siulittaasup tullia, Henrik Sachse isumaqarpoq.
Nunap immikkoortortaata siuarsarneqarnissaa siumut aqqutissaavoq
Illuatungeriit isumaqarput, ataatsimut tapiissutinit attaveqaqatigiinnermut aningaasaliissutit nunap immikkoortortaannut agguaanneqartaraluarpata, naapertuilluartumik unammilleqatigiittoqarlunilu siuarsaasoqarsinnaalissassoq. Illoqarfiit pingaarnersaanni attaveqaqatigiinnerup siuarsarneqarnissaannik salliussisunik, Naalakkersuisut attaveqaqatigiinnermut selskabinik maanna pilersitsipput. Nunami nunap immikkoortortaasa sinneri, pingaartumillu Kujataa ukiorpaalunni siuarsaaffigineqarsimannginnermikkut, siuarsarneqarnissaminnik attaveqaqatigiinnermut aningaasaliiffigineqarnissaminnik aamma pisariaqartitsipput.
- Nuna tamaat isigalugu Naalakkersuisut aningaasaliisarnissaat – imaluunniit suli pitsaanerusumik attaveqaqatigiinnermut aningaasaliissutinik Kalaallit Nunaanni Naalakkersuisut nunap immikkoortortaannut agguaassisarnissaat, nunallu immikkoortortaanni siuarsarneqartariaqartunut nunap immikkoortortaasa namminneq attaveqaqatigiinnermut aningaasaliisarnissaat pisariaqartipparput, taama Qeqqata Kommuniani borgmesteri Malik Berthelsen oqarpoq.
Nuummi mittarfik pingaartinneqarpoq
Nuummi mittarfiup miffigineqarsinnaassusaata akulikissussaa 93 procentinit 97 procentinut Kalaallit Airports-ip qaammatip ataatsip ingerlanerani qaffassimagaat, Qaqortumilu 84 procentinit 75 procentinut appartissimagaat, illuatungeriit maluginiarpaat. Nuummi silagitsinniarnerusimannguatsiarpoq, Qaqortumilu silarlunnerusalerluni.
- Sikuki Harbour-imi aamma Kaalallit Airports-imi siulersuisut Nuummi nunanilu allani inuutissarsiortunit inuttalerneqartarnerat qangaaniilli eqqarsarnartoqartittarparput. Nunap sinneranut inuutissarsiutillit aamma tapertaalluarsinnaapput. Sisimiuni umiarsualiveqarnermut siunnersuisooqatigiinni, Arctic Circle Traffic-inngortussamilu ilisimasagut Qeqqata Kommuniata atorluarniarmagit nuannerpoq, taama Sisimiuni GE-mi siulittaasup tullia Miki Brandt oqarpoq.
Annertunerusumik paasissutissat:
Borgmester Malik Berthelsen, oqarasuaat 52 55 00