Containereqarfinnik tamanit atugassiani Qeqqata Kommuniata nakkutilliinini annertusarpaa. Uani eqqaagassalerinermi pilersaarut aamma kommunip containereqarfii pillugit ileqqoreqqusaq aallaavigivavut. Kommunip containereqarfii Qinngunnguanut 01 aamma 02-mi, asfaltiliorfiup eqqaani 03-mi, Umiarsualivimmummi talittarfimmi 04-mi, KNI A/S qullersaqarfiata akiatungaani J.M. Jensenip Aqq.-taani 05-imi inissisimapput.
- Ileqqoreqqusanut nunap assingani ilanngussami siunertanut allanut nalunaarsorneqarsimatinnagu, containereqarfiit taamaallaat containerinut 20 fods-inut matoqqasunut atorneqarsinnaapput.
- Containerit qaavinut inissiisoqaqqusaanngilaq, containerillu qaleriiaateqqusaagatik.
- Containereqarfiit eqqaani nunaminertaq tamatigut kusanartuutinneqarlunilu torersuutinneqassaaq. Tassa imaappoq, biilikut, angallatikut, atortut assigisaallu qanoq pisoqaraluarpalluunniit containeqarfinni ersiinnartunngorlugit inisseqqusaanngillat.
- Aalajangersakkat sukumiinerusut Qeqqata Kommuniata nittartagaani takuneqarsinnaapput imaluunniit Teknikkimut Avatangiisinullu immikkoortortami pissarsiarineqarsinnaallutik.
Qulaaniittunik aammalu ileqqoreqqusani aalajangersakkanik unioqqutitsineq ingerlaavartumik m2-mut 100 koruunimik akiliisitsinermik kinguneqassaaq, soorlu assersuutigalugu containerimut 20 fods-imut qaammatit aallartinneri tamaasa qaammammut 1.625 koruunit.
Akiliisitsinerup saniatigut allagarsiineq akunnerni 48-ini ingerlareernerata kingorna siumut ilimasaaruteqaqqaarani piginnittumut akisussaaffinngorlugu akiligassanngorlugulu inissitat ilaat tamakkerlugilluunniit Qeqqata Kommuniata peersinnaavai, sumiiffimmilu atuineq atorunnaarsissinnaallugu.
Containerinut inissanik attartortut annertunersumik nakkutilliinissamut allannguinissaminnut naammattumik piffissaqartikkumallugit, akiliisitsinerit aamma pinngitsaaliilluni peersinissaat aatsaat 2018-imi septembarip aallaqqaataaniit atuutilissapput. Attartortut inissiivitik inatsisinut naapertuuttunngorsarunikkit imminut akilersinnaaneruvoq.
Illoqarfik saligaannerusoq takunissaanut assut qilanaarpugut.Aasarsiorluarisi.