Ineriartortitsinissaq ataatsimilluunniit akerlilersinnaanngilara, ilumut qulakkeerneqarpat aningaasarsiornikkut inuuniarnikkullu inuiaqatigiit tamattaalluta iluaqutigissagutsigu, soorunami.
Nunatta oqaluttuarisaanerani aningaasaliiniarnerit annertunerpaartaat aammalu isertitassatut ilimagisat qulakkeersimatinnagit, avaqqunneqarsinnaanngilaq aalajangertigani eqqarsarluaqqaarnissaq.
Taamaattumik inatsisartut nersualaarumavakka, aalajangiinissaq sioqqullugu qulaajagassat qulaajarluaqqaarneqarnissaannik piffissaqarluarumallutik aalajangermata, naak isumaga malillugu 2015-imili inatsisartuni aalajangertoqartinnagu tamanna pisimasariaqaraluartoq.
Aningaasanimmi qilammiit nittaalatut nakkaaginnartutut ittunik aningaasaateqanngikkaanni aammalu politikkikkut innuttaasut aningaasaataasa paarinissaannik akisussaaffilerneqarsimagaanni, akisussaassuseqarluni kukkunaveersaarnissaq isumatusaarnerussaaq.
Naalakkersuisuniit Borgmestereqatinniillu oqaatigineqartarpoq misissuinerpassuit ingerlanneqartareermata misissueqqinnissaq pisariaqartinneqanngitsoq.
Nalunaarusiat ilaatigut Deloitte-miit suliarineqarsimasut taamak suliarilluaatigisimappata, soormitaavaana aningaasarsiornikkut timmisartuussinikkullu ilisimasaqarluartunit aammalumi inatsisartuniit nalunaarusiat amerlasoorpassuarnik nalorninartoqarpallaarnerarlugit amigaateqarpallaarnerarlugillu taamak uparuartoqarneqartigisut?
Aningaasaqarnermut siunnersuisooqatigiinniit ilaatigut uparuarneqarpoq, paasissutissani saqqummiunneqartuni annaasaqarfiusinnaasut kingunerisinnaasaallu annikitsuinnarmik isummerfigineqarsimasut, taamaattumillu suliniummi aarlerinaataasinnaasut pitsaanngitsumillu nikingassutaasinnaasut immikkut isiginiarneqarnissaat pingaartuusoq.
Nunami 56.000-inik inulimmi ilumullu taamak amerlatigisunik mittarfippassuaqarnissaanik apeqqusernartumi, nunattalu oqaluttuarisaanerani annertunerpaamik aningaasaliiniarnermi, ilimagisat eqqoriaanerilluunniit kisiisa allaavigalugit aalajaangertoqarsinaanngilaq, ilimagalugu mittarfissuartaaraanni ukioq kaajallallugu takornariarpassuit tikeralernissaat.
Ilimagineqartutuummi pisoqanngitsoorpat akiligassarujussuarmik avitsisussaat uaguinnaapput. Taamaattoqassagaluarpallu atugarissaarnitsinnut qanoq sunniuteqassanersoq kiap oqaluttuussinnaavaatigut?
Arlariinnik mittarfissuartaarnikkut takornariarpassuaqalernissaanut taamak qulanngitsigisoqarsimappat, paaserusunnassaaq ullumikkut Islandimiit Ilulissanut ukiuunerani sooq toqqaannartumik timmisartuussisoqartannginnersoq aammalu ukiorpaalussuanngortuni Islandimiit Nuummut aqquteqareermat, takornarissat Nuummmukartartut malunaatilimmik amerliartorsimanerannik kinguneqarsimanersoq?
Tassami kinaluunniit namminersortoq aningaasarsiornissaminik soqutigisalik, 1.mia.kr. sinnerlugit aningaasaliinavianngilaq, nalunngikkuniuk suliffeqarfini ukiumut taamaallaat qaammatit 3-4 taamaallaat atorneqassasoq. Taamaattumik aperisariaqarpugut innuttaasut aningaasaataat milliardit, piffissap ilaannaani taamaallaat atorneqarsinnaasumut illoqarfimmut ataatsimut atorneqarnissaat ilumut silatusaarnerussanersoq?
Aningaasat taamak amerlatigisut aningaasarsiornikkut qularnaatsumik ineriartortitsisinnaasunut, soorlu sumiiffinni aalisagaqarfiulluartuni tunitsiviit pitsanngorsaaffiginerisigut imaluunniit Qeqartarsuup Tunua ilanngullugu angallannikkut pitsanngorsaaffigigutsigu, soorluuna amerlanerpaanut nuannaarutaassagaluartoq?
Naalakkersuisut Borgmestereqatikkalu isumaqatigaakka ineriartoqqissagutta aningaasarsiornerput qaffassartariaqaratsigu, pingaartumik kujataani inuerukkiartornera illuatunngaanut saatinneqassappat taqqavani piaartumik iliuuseqartoqarnisaa avaqqunneqarsinnaanngilaq. Taamaattorli Qeqqata Kommunianiit ernummatsigisarput tassaavoq, illoqarfinnut pingasunuinnaq taamak takitigisunik 4-5 milliardit atorlugit mittarfiliornikkut, nunatta karsiata artukkerneqarnissaa, taamaasilluni nunatta sinnerani sumiiffiit allat ineriartortinneqarnissaannut akissaaruttoqarluni. Tamanalu nunatta sinnerani naligiinnginnermik annertuumik pilersitsissaaq, tamannalu partiit arlaannattaluunniit kissaatiginngikkaa qularinngilara.
Puigussanngilarpummi Naalakkersuisooqatigiit isumaqatigiissutaanni neriorsuutigineqartut immikkoortut 350-it aamma aningaasalersorneqartussaammata, taakkunanilu inoqarfiit minnerit 7 mittarfittaarnissaanik Kangerlussuarmiillu Sisimiunut aqqusinniortoqarnissaa aamma neriorsuutgineqarnikuupput.
Taamaattumik nerioqaanga inatsisartut aalajaangiinissaminni, aamma Qeqertarsuup Tunuani, Tasiilami Qeqqanilu aamma angallannerup tungaasigut ineriartortitsisoqarnissaata akissaqarfiginissaat puigussanngikkaat.
Inussiarnersumik
Malik Berthelsen
Qeqqata Kommuniani Borgmesteri