Tuttunniarnissaq
2018-mi ukiaanerani tuttunniarnissami pisassiissutit qummut killilerneqanngillat, taamaakkaluatorli tuttunniarnissamut akuersissuteqartoqassaaq.
Akuersissut pineqarsinnaavoq nunaqarfinni aqutsisut allaffiinut, Sisimiuni kommunip allaffiata saaffiginnittarfianut aammalu aalisarnermut piniarnermullu siunnersortimut saaffiginninnikkut.
Tuttunniarneq piffissami tullinnguuttumi ingerlassaaq:
Sunngiffimmi piniarnermut allagartallit 1.8.-30.9.
Inuutissarsiutigalugu piniarnermut allagartallit 1.8.-15.10.
Umimmanniarnissaq
Qeqqata kommuniani Sisimiut aqutsiveqarfiani umimmanniarnissamut umimmaat 300-t pisassiissutaapput. Pisassiissutit ukiup siuliitulli inuutissarsiutigalugu piniartunut (75%) aammalu sunngiffimmi piniartunut (25%) avinneqarput, kisittisinngorlugu 225/75.
Umimmannut akuersissiuumik qinnuteqartoqarsinnaavoq aalisarnermut piniarnermut siunnersortimut kiisalu kommunimi saaffiginnittarfimmut kingusinnerpaamik 27. juli nal. 15.00.
Qinnuteqartut akornanni makitsinermi makitaasut allattorsimaffiat Sisimiuni nunaqarfinnilu allakkanut nivinngaavinni takuneqarsinnaassaaq julip 27-ata kingorna.
Qeqqata kommuniani Maniitsup aqutsiveqarfiani umimmaat qummut killilernagit pisassiissutigineqarput, taamaattorli umimmanniarnissamut akuersissummik peqarnissaq piumasaqaataavoq.
Akuersissut pineqarsinnaavoq Sisimiuni kommunip allaffiata saaffiginninnikkut aammalu aalisarnermut piniarnermullu siunnersortimut saaffiginninnikkut, kiisalu nunaqarfinni aqutsisut allaffeqarfiinut saaffiginninnikkut.
Umimmanniarnissaq aallartissaaq augustip 1-ani ingerlassallunilu oktoberip 15-iata tungaannut.
Akuersissummik qinnuteqarnermi makku piumasaqaataapput:
Sunngiffimmi piniarnermut allagartap 2018-imi majip aallaqqaataa sioqqullugu akilereersimassaa.
Qinnuteqartut 16-inik ukioqalereersimassapput.
Sunngiffimmi piniartunut tuttunniarnissamut umimmanniarnissamullu akuersissutit taamaallaat inunnut Kalaallit Nunaanni inuit allattorsimaffianni ukiut kingulliit qulit iluanni ukiuni kingullerni marlunni ataavartumik najugaqasimasunut tunniunneqarsinnaapput.
Inussiarnersumik inuulluaqqusilluta
Qeqqata Kommunia