Gaba Lynge, 15-inik ukiulik, meeqqat atuarfiani ilinniartitsisutut, atuarfimmit suliffimmik misiliinissaminik toqqaavoq. Kisianni sumiluunniiunngitsoq, atuartitsissullu arlaannaanngitsorlu. Sarfannguani tuluttut ilinniartitsisutut misiliissalluni toqqarpaa. Tamannalu peqqissimissutigisimanngilaa.
- Naak meeqqanut ilinniartitsisuusussaagaluarlunga, ilikkakkanik ulikkaarpunga. Ilaatigut inunnik allanik pitsaanerusumik oqaloqateqarsinnaaneq ilikkarpara, Gaba Lynge Nalunnguarfiup Atuarfiani 10. klassimi atuartoq oqaluttuarpoq.
Marloriarluni suliffeqarfimmi misiliisarput, siullermik 9. klassimi aappassaanillu ukiumi naggataamik atuarfiusumi. Ukioq kingulleq Taseralimmi Gaba teknikeritut misiliivoq, ukioq mannalu meeqqat atuarfiini ilinniartitsisutut misileerusussimalluni. Kissaateqarpormi.
-Filmiaqqanik suliaqarnissara soqutigisarisorujussuuara, marlussunnillu sanareernikuullunga. Siammarterneratigullu amerlanerusut soqutiginnilersinnissaat kissaatigalugu, pilersitaqarusuttoq Gaba oqaluttuarpoq. Workshopertitsereerlunilu youtube-mut filmiliortarpoq, ilitsorileramili tamanna soqutigisarisimavaa.
Isiginnaartitsisartuunissamik takorluuineq
Najugaqarfiit minnerusut aamma Gaba-p ornikkusuppai. Nunaqarfimmi najugaqarneq qanoq innera misigalugu.
-Atuartut atuartitakka inequnaqaat, taamaattumillu misigisaq nuannersimalluni. Tuluttut ilinniartitsisuunissara toqqarpara, taamaattumillu atuartitsineq tuluttuunerusoq ingerlanneqarluni, taamatullu filmiliornermut, oqaluttuariaasiliornermut, isiginnaagassialiornermut saqqummiinermullu misilittakkama ilisimasamalu ingerlateqqinnissaanut periarfissaqarsimallunga, taamatullu ingerlatitsisinnaasimaneq nuannersupilussuulluni, Gaba oqarpoq.
Gaba-p siunissamut pilersaarutai imaluunniit takorluugai ilinniartitsisutuunngilaq imaluunniit teknikerituunngilaq, naak suliffimmik misiliiffissatut innersuussutigigaluarai.
-Allarujussuarmik misiliineq, suliamullu ilisimasaqalerneq nuannersimavoq, Gaba isiginnaartitsisartuunissamik takorluugaqartoq naggasiivoq.
Gaba-p youtube-mi kanel-ia Gaba Films-imik taaguuteqarpoq, filmiliaanik annertunerusumik uani takusaqarsinnaavutit:
https://www.youtube.com/channel/UCIGNoaemtIyHH_bV4ASk88g