Imminut toquttarnerup pinaveersaartinnissaanut pikkorissaaneq, Kalaallit Nunaanni Imminut Toquttarnerup Pitsaaliornissaanut Nuna Tamakkerlugu Periusissaq 2013-2019-ip ataani inissisimasoq, Qeqqata Kommunianit arlaqartunit peqataaffigineqarpoq, pikkorissaanermillu ataqatigiissaarisup, Namminersorlutik Oqartussanit Peqqissutsimik suliaqarnermut siunnersorti Arnârak Patricia Bloch-imit iluarisimaarneqarpoq.
-Pikkorissaanerup siunertaraa, kikkut tamarmik pitsaasumik inuuneqarnissaminnik pisinnaatitaanerisa oqariartuutaanik siammarterinissaq. Imminut toqquttarnermik sulisut eqqugaasartunut pikkorissaaneq attuumassuteqartorujussuuvoq, taamaalillutimmi pisumi sakkortoqisumut isumaginninnissaminnut sakkussaqalissammata. Assersuutigalugu, oqaloqatiginnittarnissamut, imminut toqunnissamut pissusilersuutinut ersiutinik takunnissinnaalernissamut sakkussaqarlualissapput kiisalu eqqugaasumut saaffiginninnissamut periutsinik ilinniagaqarlutik. Taamatut pikkorissaasoqartarnissaa pingaarutilerujussuuvoq, nunatsinnimi tarnip pissusiinik ilisimasallit amigaataapput, taamaalillutillu saaffiginninnissamut periarfissanik imaluunniit ikiuutinik amigaateqarlutik misigisoqaratarsinnaalluni. Inuit imminut toqunnermik eqqugaasimasunik suliaqarnissamut, sulisut pikkorissarnikkut sakkussanik tuniorarneqarput, Arnârak oqarpoq.
Ilassutigaalu, inuit imminut toqunnissamik navianartorsiorsinnaasunut apersuinissatsinnut tunuarsimaartartugut ilisimatusarnerit takutikkaat, matumani inummut ajorseriartitsinissatsinnut imaluunniit kukkusumik aperinissarput qunugisarlutigu.
-Qunugissanngilluinnarparput. Apeqquteqarnermi aamma pinaveersaataavoq. Inuup takuneqarnini tusaaneqarninilu iluaallaatigisarpaa. Inuiaqatigiittut iliuuseqarnissaq akisussaaffigaarput, oqarpoq.
Pikkorissaaneq attuumassuteqartoq
Imminut toquttartut suli amerlavallaarujussuarput.
2016-imi Kalaallit Nunaanni inuit 47-t imminut toqupput, imminullu toquttartut inuusussigaluttuinnarlutik.
Soorlu oqaatigineqareersutut immikkoortup iluani ilinniarsimasut amigaatigineqarput, taamaattumillu Qeqqata Kommuniani Ilaqutariinnut Kiffartuussivimmi aqutsisumut pikkorissaanermullu ataqatigiissaarisumut Dorthe Margrethe Møller-imut taamatut pikkorissaanermik aaqqissuussisoqarnera nuannaarutigineqarpoq.
-Suliffinnit aasigiinngitsunit sulisut arlallit peqataanerat assut nuannerpoq. Imminut toqunnissamik ulorianaateqartunik oqaloqatiginnissinnaanerput pillugu napparsimavimmiit atuarfimmiilluunniit saaffigineqartarpugut, taamaaliorusukkaluarluta arlaatigut ulapputeqarsimanngikkutta sulisunik amigaateqartarpugut, taamaattumik sulisut amerlanerusut tamakkuninnga isumaginnissinnaanngorlutik sakkussanik pissarsisut qujanaqaat, taamatullu pinaveersaartitsinissamut periarfissaqarlualerluta, Dorthe Margrethe oqarpoq.
Pikkorissaaneq imminut toquttarnermik, eqqarsaateqartarnermut pissusilersortarnermullu, inatsisinut, aarlerinaateqarnermut naliliinermut, sungiusarnernik pisuusaartitsinernillu paasinnissinnaanermik imaqartortaaq, assigiinngitsutigut sulianik ilisimasalinnit peqataaffigineqarpoq. Meeqqerivinnit, atuarfinnit, peqqinnissamut ikiortinit, napparsimavinnit, sunngiffimmi klubbinit kommunillu iluani immikkoortunit assigiinngitsunit suliamik ilisimasallit peqataapput, pikkorissaasuullutillu Danmark-imiit Livslinjen-imit Tina Holm Johansen aamma Julie Hoffman.
Pikkorissaaneq siullermi Sisimiuni ingerlanneqarpoq, sapaatillu akunnera kingulleq Maniitsumi, nunaqarfinnit peqataasoqarluni ingerlanneqarpoq.
-Inuiaqatigiinni ajornartorsiut annertooq pillugu allat ilisimasaqarlualernissaat sakkussaqalernissaallu eqqarsaatigalugu, amerlanerusunullu sapinngisamik siaruaanneqarnissaat eqqarsaatigalugu, assingusumik pikkorissaanernik ingerlatsisoqartarumaartoq neriuutiginarpoq, Arnârak Patricia Bloch naggasiivoq.
Pikkorissaaneq ilaatigut atuarfiit, meeqqeriviit sullissisullu akornanni suleqatigiissitamik pilersitsinermik kinguneqarpoq.