”Una suliniut, utoqqaat peqataatinneqarlutik isumaqarluartimillu tamanut ornittarfeqalernerat, nuannaarutigisorujussuuara" Ilaqutariinnermut Isumaginninnermullu ataatsimiititaliami siulittaasoq Hans Frederik Olsen oqarpoq.
Suliniut Asiarfik, tassa pisuinnarnut aqqut aneerasaartarfik qisummik sanaaq 70 miiterinik takissuseqarpoq aneerasaartarfialu 25 kvadratmeteriulluni, juunip qaammataani aallartinneqarpoq sisamanik workshoppertoqarluni Nviarsiani utoqqarnik amerlasuunik peqataasoqarluni. Utoqqaat qanoq pitsaanerpaamik pinngortitamut appakaassinnaalernissaannut isumassarsiorluni siunnersuusiortoqarlunilu workshop sisamaasuni ingerlanneqarnerini sulisoqarpoq. Innuttaasut akuutinneqarnissaannik suliaqartuusoq, Danmarkimi illussanik titartaasartoq Sidse Carroll uani suliaqarnermi peqataavoq.
”Aneerasaartarfissarput aatsaat tummarpara. Aasarnissaanut qilanaartuutigaara atortussai inisseriarpata nuannersorujussuussaaq, Johanne Zethsen, Niviarsiani najugaqartoq, oqarpoq.
Imaanut isikkivilerlugu qinngummik upernaamut ikkussisoqarlunilu killulimmik nerrivinnik issiavinnillu takisuunik, kiisalu aalisakkanik panertitsiviusinnaasumik quimik inissiisoqassaaq, isumassarsiat tamarmik utoqqaat isumassarsiaraat. Suliniutip taannartaa Arktisk Aldring-imit, Københavns Universitet-imeersumik, aammattaaq suliniummut ilaanikuusumut aningaasalersorneqarpoq. Pisuinnarnut aqqummik qisuusumik aammalu aneerasaartarfimmik nasiffimmik sanaartorneq kommunip atuilluartuunissamik aningaasaateqarfianit aningaasaliinikkut piviusunngorsinnaasimavoq.