Qeqqata Kommunia pisortat suliffeqarfiutaatut atuilluartuunissamik kiisalu suliffeqarfiup peqqinnartuunissaanik immikkut sammisaqarpoq kajumissuseq, akisussaaqataaneq, ataatsimoorneq, pisinnaasatigut ineriartortitseqatigiinneq, oqaloqatigiinnerlu pingaartitaralugit.
Ukiumi sulisutsialannik toqqaasoqaraangat Kommunip qitiusumik allaffissuani suleqat ataaseq aammalu kommunip suliffeqarfiiniittuni assigiinngitsuni, assersuutigalugu atuarfiit, meeqqeriviit allallu suliffiit Qeqqata Kommiuniata ataaniittuni suleqat ataaseq toqqarneqartarpoq.
Qitiusumik allaffeqarfimmi ukiumi sulisutsialattut toqqarneqarpoq: Maniitsumit Seth Kristiansen.
Seth Kristiansen 2008-imi apriilip aallaqqaataani kommunimi atorfinippoq, Seth-illu suleqatiminut qiimmassaasarnini tunuarsimaanerlu ajornini, suliassaminik ilisimaarinninnini, ullut tamaasa piffissaq eqqorlugu suliartortuaannarnini, saaffikkuminartuunini, eqqissillunilu sulisarnini ilisarnaatigalugit. Seth-ip suliartornissaminut innarluutini akimmiffittut isiginngisaannarpaa, nuannaarlunilu suliartortuaannarluni.
Qitiusumik allaffissuup avataani, Napasumi aqqusinilerisuni Karl Goliathsen ukiumi sulisutsialattut toqqarneqarpoq.
Karl Goliathsen 2016-imi oktobarip aallaqqaataani atorfinippoq, ilaatigullu suliffimminut ataqqinnittuunini, piffissaq eqqorlugu suliartortuaannartuunini, saaffikkuminartuuninilu ilisarnaatigalugit. Napasumi aqqusinilerisutut nunaqarfimmik saligaatsuutitsinermigut maluginiarneqarsimavoq.
Pisortaqatigiit Ukiumi suleqatitsialammik toqqaanissaminnut toqqammavissanik sisamanik aallaaveqartarput, tassaallutik:
* Suliffimmi pitsaasumik atugassaqartitsineq * Ataqatigiissitsisinnaassuseq
* Ikiuisinnaassuseq kajumissaarisinnaassuserlu
* Aalajaatsumik suleqataassusilik
Karl Goliathsen
Seth Kristiansen