Nunarsuatsinni illoqarfiit assigiinngitsut ilungersunartumik timersuutinik aaqqissuussisarnitik pissutigalugit, ukiut tamaasa nunarsuarmi sumi tamaninngaanniit peqataaffigineqartarnitik tusaamasaassutigilersimavaat.
Nunarpullu nunarsuarmioqatitsinnit timersortartunit suli annertunerusumik ilisimaneqarnerlunernissaanut Arctic Circle Race pingaarutilerujussuarmik nunatsinnut inissisimavoq, naak taamaallaat nammineq kajumissutsiminnik sulisunik suliarineqaraluarluni.
Qeqqata kommunianiillu upperaarput nunatsinni timersuutini aaqqissuunneqartut annertunersaat suli ineriartortinneqarsinnaasoq aammalu ussassaarutigilluarneqarneratigut suli nunarsuarmioqatitsinnit tusaamaneqarnerulersinnaasoq.
Tamannalu tunngavigalugu kommunemiit ACR-ip siulersuisuinut ilaasortassatut Anders Steenbakken toqqarput.
Nuannaarutigeqaara isumalluarfigalugulu Andersi ACR-ip ineriartorteqqinneqarnissanut soqutiginnilluni peqataajumammat. Isumaqarpungalu Andersip misilittagai, soorlu Tasiilami The Arctic Challenge-imik aaqqissuisuusarsimanera aammalu Visit Greenland-imi pisortaanermini pilerisaarinermik suliarissarsimasai annertuumik ACR-imi iluaqutigineqassasut.
Anders steenbakken-ip sinniisussaatut Polar Oil-imi logistikchefitut atorfilik siusinnerusukkullu Kangerlussuarmi takornariartitsisartutut misilittagaqartoq, Niels Chemnitz toqqarneqarpoq.
Malik Berthelsen, Borgmesteri