Naluneqanngitsutut attaveqaatitigut ineriartortitsiniarnermi pilersaarutit saqqummiunneqarmatali, ineriartortitassani Qeqqata Kommunia mininneqarnikuuvoq. Tamannalu soorunami ineriartornerup unittuuvinnissaanik innuttaasut akornanni assorujussuaq ernumanermik pilersitsinikuuvoq.
Takornarissat amerlisarneqassappata pissanganarnerusunik assigiinngissitaarnerusunillu nunatta neqerooruteqartarariaqarnera Inatsisartunit oqariartuutigineqarnera isumaqatigisorujussuuara. Tassami nunarput ima angitigivoq nunap immikkoortui tamarmik alutornartunik immikkuullarissuseqarlutik. Kangerlussuullu Sisimiullu akornanni nunatarujussuaq tikikkuminartumiinnini pissutigalugu, tassaavoq timertik atorlugu migisigisassarsiortartunut (adventureturister) ukioq kaajallallugu periarfissagissaarnerpaaq, taakkuuppullu aningaasanik annertunerpaamik pissarsissutaasartut.
Inatsisartut amerlanerussuteqarluartut aqqusinersuup aallartisarneqarnissaanut aappaagumut aningaasanut Inatsimmut aningaasaliinissaminnik neriorsuinerat, Qeqqata Kommuniani innuttaasunut utaqqikatattunut ineriartornermullu peqataarusuttunut neriuummik qaamanermillu angisuumik pilersitsissapput.
Tamannalu pillugu Inatsisartut assorujussuaq uummatinnit nersualaarpakka.
All: Malik Berthelsen Borgmesteri