”Inuusuttut angajoqqaaminni najugaqaannarsinnaapput, taaamaalillutillu sungiusimasaminnik avatangiiseqarlutik, tamannalu tamat isiginnissuseqartumik sulinitsinnut, taamatullu inuusuttut attaveqaataanit amerlanerusunik akuutitsinitsinnut iluaqutaalluni” taamak Jakobine Goleathsen, Qeqqata Kommuniani Maniitsumi ikiorsiisarnermut ilaqutariinnermullu immikkoortortami aqutsisoq oqarpoq. Inuusuttut pinngitsuuisinnaanermik ajornartorsiuteqartut eqqortumik ikiorneqarnissaat, Jacobinep uummateqarfigaa. Inuusuttunut ikiuineq inuusuttut ulluinnaanut qanorlu inuunerminni inissisimanerannut naleqqussartussaavoq, inuusuttullu inersimasunut naleqqussakkamik katsorsaanermik ingerlatsinermik ingerlatsineqartillutik iluaqutigiuaannanngilaat.
”Nuummut inuusuttunik katsorsartitsiartornikuuvugut, malinnaanissaminnilli ajornartorsiuteqartarput, tamannalu tunngavigalugu imminut aperisimavunga qanoq iliorsinnaavugut? ” taama Jacobine oqaluttuarpoq. Qanoq iliorsimanerinut aqeqqummut Jakobine oqaluttuarpoq, Majoriaq, Pilersitsiviup sannavia iggavialu, inuusuttunut sunngiffimmi ornittagaq, miljøarbejderit kiisalu Maniitsumi inuusuttut najugaqaqatigiiffiat akuutillugit, tamat isiginnittumik iliuusissamik suliaqarsimallutik.
Ataatsimiinnerit ingerlanneqarput, kina qanoq iliussanersoq eqqartorneqarluni, katsorsaanerullu aallartinnginnerani inuusuttunut saqqummiisoqarluni. Inuusuttut siunissami qanoq periarfissaqarnersut, aningaasaqarnikkut periarfissaat pillugit saqqummiisoqarpoq, katsorsaanerlu qanoq kinguneqassanersoq nassuiaasoqarluni. Katsorsaanerup aallartinnginnerani Majoriaq aamma inuusuttunut Majoriamut attuumassuteqartunut marlunngornerit tamaasa kaammattuinermik ataatsimiisitsisarpoq.
Katsorsaanermi Kalaallit Nunaanni nalinginnaasumik katsorsaariaatsip atorneqartartumik sakkukinnerusoq atorneqarpoq. Assersuutigalugu inuusuttut inortuippata, ingerlatsinermit anisinneqaannarneq ajorput, ingerlatsinerullu ingerlanerani utersaarfeqarpata, angajoqqaat peqataaffigisaannik oqaloqatiginninnerit amerlineqartarput. Ingerlatsinermi eqimattakkaarluni ataasiakkaarlunilu oqaloqatiginninnerit ingerlanneqartarput, inuusuttullu ilaat tarnip pissusiinik ilisimasalimmut innersuunneqarnikuupput. Inuusuttut arlaqartut misigissutsit pillugit oqaloqatiginninnissamik ammarnissamillu sungiusimasaqanngillat. Arlalitsigut meeraanerminni annernarluinnartunik misigisaqartarsimasarput, taamaalillutillu paasineqarlutik oqaloqatiginnittarnissamik pisariaqartitsisarlutik, Jakobine oqarpoq.
Katsorsaareernerup kingorna ingerlarereersut, inuusuttut tallimat suli pinngitsuuisinnaanerminit aniguisimaarinnittuupput, kingornatigut katsorsaanermillu ingerlatsillutik. Inuusuttut ingerlatsisimasut oqaloqatiginnittarput, tassani inuusuttut ingerlallualernissaannut, inuunermillu pitsaasumik pilersitsinissaanut ikiuutit suliniutillu suut pisariaqartinneqarnersut ersarissarneqartarlutik.
Allorfimmit katsorsaasoq Margrethe Geråe, Maniitsumi inuusuttunik sumiiffimmi katsorsaanermik ingerlatsisimasoq, inuusuttut immikkut ingerlatsinissaannut neeqeroorfigineqarsimanerannik nuannaarutiginninnermik oqariartuuteqarpoq. Katsorsaanerit allannguititsisimaneranik takutitsisunik, allannguisimanermut oqariartuutinik katersisimavoq:
”uummaarinnerulerpunga, sammisartagarinikuusakkalu utersaaleriartorput, soorlu timersornermik soqutiginninnera”.
”Itigartitsisinnaanissara ilikkarpara”
”aalakuunnginnissara ilikkarnikuuara, tamannalu ingerlatiinnassallugu”.
”ullaarnganiik hash eqqarsaatigisarnikuuara, maannakkulli hashi eqqarsaatigisorsuuneq ajorpara”.
Paasisaqarnerorusukkuit uunga attaveqarit:
Jakobine Goleathsen
81 78 55