airplanebooksbriefcase business cogs cross election entertainment fish house law lockmedicalpeopleselfservices socialtax

Sisimiut eqqaani Kangerluarsuk Tullermi ikuallattoq pillugu nalunaarut


17. juli 2019

   

2019-imi ataasinngorneq juunip arfineq-pingajuani Sisimiut avannaatungaani Kangerluarsuk Tullermi annertuumik ikuallattoqalerpoq. Sisimiut avannammut-kangisissortaani Kangerluarsuk Tulleq sinerlugu illuaqqanut ikuallannerup siaruaannginnissaanut, Qeqqata Qatserisartui sapaatip akunnera kingullerli ulapputeqarput, tamannalu iluatsissimalluni. Ikuallattorli ima annertutigisimavoq, qatserisartut ikuallattumik qamitsisinnaasimanatik.

 

Sapaatip akunnera qamiteriniarneq iluatsinngimmat, marlunngornermi ualikkut Air Greenland-imit qulimiguulimmik ikuallattoq qulaallugu qamiterniarneqarpoq. Qulimiguulimmit immikkoortumilu qatserisartunit ataatsimut suliniuteqarneq kiisalu sialualaarneratigut maannakkut ikuallattoq annikillisingaatsiarneqarpoq. Taamaalillunilu ikuallattup qamiterneqarnissaanut, annertuumik pujoqarnerata ajornartissimasaanik, qatserisartut suliniuteqarnerminnik ingerlatitseqqissinnaalerlutik.

 

Kangerluarsuk Tulliup qinnguani annertuumik pujuliortoqarnera patsisaalluni, Sisimiut Kangerlussuullu akornanni Arctic Circle Trail-ip aqqutaata ilaanik atuinnginnissaq qatserisartunit suli kaammattuutigineqarpoq. Uani Kangerluarsuk Tullermi aamma, Nerumaq aqqusaarlugu, Eqalugaarniarfiup akornanni aqqut pineqarpoq. Illuatungaatigut Eqalugaarniarfiup aamma Sisimiut akornanni Arctic Circle Trail kujallermik taaneqartartup, Sarfannguit qanittuatigut ingerlasup atorneqarnissaa, Qeqqata Kommuniani Qaterisartorqarfimmit innersuusutigineqarpoq. Aqqut inussunnik nalunaaqutsersugaavoq, tamannalu maluginiarneqassasoq pisuttut qinnuigineqarput.

 

Nunaqarfik Sarfannguit, UNESCO-qarfimmi inissisimasoq, piareersareerpoq innuttaasullu paasissutissiivigineqareerlutik, Kangerlussuarmiillu Sisimiunut takornarissanik pisuttunik tigusinissaminnut piareersimapput. Siuliani aqqut taaneqartoq atorlugu takornarissanik pisuttoqassappat kiisalu Sarfannguanut ingelaqqikkusullutik, aqqutissaminniinngikkaluartumut, taava nunaqarfiup akianiittumut Kuummut imaluunniit nunaqarfiup eqqannguani sarfaliup akiatunginnguanut Timerlermut ingerlasinnaapput. Tassanngaanniillu pisuttut Sarfannguanut ikaarunneqarsinnaapput. Sarfannguani unnuinissamik pisariaqartitsisoqalernissaanut, Sarfannguani Atuarfik piareersimavoq. Tamatuma saniatigut pisuttut pisoqqinnissaminnik kissaateqanngikkunik, Sarfannguaniit Sisimiunut angallanneqarnissamut isumaqatigiinniartoqarnissaanik periarfissaqarpoq.

 

Arctic Circle Trail ukiumut takornarissanik pisuttunik 1000-it sinnerlugit ingerlavigineqartarpoq. UNESCO-qarfik aqqusaarlugu ingerlaviusinnaasoq, ukiuni kingullerni ingerlaviup kujataatungaa inussunnik nalunaaqutersorneqarnikuuvoq.