Sermersuup ilaa Kangerlussuarmit 30 km ungasissusilimmiittoq pinngortitamilu aqqusineq atorlugu tikinneqarsinnaasoq, Nunarsuarmi kingornussassaqarfimmiippoq. Ukiut tamaasa takornarissat 15.000-it sermersuaq takornariartarpaat aammalu takornarialerisut nunarsuarmi kingornussassaqarfimmi ingerlatitsinermut suliniutinik ujartunikuupput.
Takornariaqarneq aallarteruttorpoq Nunarsuarmioqatigiinnullu kingornussassaqarfik Aasivissuit – Nipisat Kangerlussuarmi sermersuup tungaanut aqqusinermi siullermeerluni allagartarsuarmik ikkussiffigineqarpoq.
Nunarsuarmioqatigiinnut kingornussassaqarfik Aasivissuit - Nipisat annertoorujussuuvoq kulturikkut kingornussassamik ingerlatitseqqiinissamut periusissatigut pilersaarummik annertuumik pisariaqartitsisoq taamaalilluni Nunarsuarmioqatigiinnut kingornussassaqarfimmik ataqatigiissutaata takuneqarsinnaassusaa siunissamiilu ineriartortinneqarnissaanut annertunerusumik oqaluttuarineqarsinnaanera qulakkeerneqarluni. Kisianni Sermersuup Immallu akornanni Inuit Piniartiartarfiat - Aasivissuit - Nipisat ukiut 4500 ingerlaneranni Inuit kultureqarfiatttut nalissaqanngitsumik allanngortinneqarsimannginnerminut UNESCO-p Nunarsuarmi kingornussassat allattorsimaffanni 2018-imi juunip 30-ani ilanngutsinneqartoq, tikeraarneqarlualereepoq.
Takorluugaasoq tassaavoq, ingerlatitseqqiiniarluni illersuiniarlunilu suliniutaagalllartut ukiuni aggersuni annertunerumik ineriartortitsinissamut aammlau ataqatigiinnerusumik ingerlatitseqqiinissamik suliniutissanut aallarniutitut atorneqassasut.
Taamaattumik Qeqqata kommuniata nunatap Nunarsuarmioqatigiinnut kingornussassanngortinneqarsimaneranut isaaviata annersaani periusissatigut pilersaarummik pilersitsinnginnermi iliuusissatut siulliit ilaattut allagartamik pilersitsivoq.
Nunarsuarmioqatigiit kingornussassaqarfianni Aasivissuit - Nipisat 2019-imi maajip aallaqqaataani Kingornussussassaqarfimmi Nakkutilliisutut atorfinitsinneqartup Francisca Davidsen Olsen, UNESCO Nunarsuarmioqatigiinnut kingornussassaqarfiat maana ingerlalerluni tikeraanut oqaluttuarsinnaasumik allagartarsuaqalernera nunnaarutigivaa. Taamaailluni aasap ingerlanerani Nunarsuarmioqatigiit kingornussassaannut appakaaffissat marluusuni Sisimiut Kangerlussuarlu kiisalu Sarfannguani, nunatami kisiartaalluni najugaqarfigineqartuusoq, utaqqiisaasumik ingerlatsqqiivinnik ikkussisoqarpoq.
- UNESCO Nunarsuarmoqatigiinnut kingornussassaqarfiusumut maannakkut appakaannersutit siusinnerusukkut takusinnaasimanngilat. Taamaattumik uagutsinnut tamanna annertuujuvoq. Allagartarsuup siullerpaap takussutisippaa, maannakkut nunarsuarmioqatigiit kingornussussaqarfianniittutit, Kingornussassaqarfimmi Nakkutilliisoq nutaaq Kangerlussuarmi peroriartornikuusoq Francisca Davidsen Olsen oqarpoq.
Sumiiffinni sinerialinni, aasaq mannamiit arlalissuarnik tikeraanik tigusaqarfiusussatut naatsorsuutigisani, illersuutaagallartussanik soorlu pisuttut aqqutaannik kiisalu pinngortitamik kulturikkullu pingaartitanik neriuinissaq minnerpaaffianiitinniarlugu allagatanik paasissutissiissutinik ikkussuigallartoqassaaq.
