Kangerlussuarmi mittarfiup 2810 meterimik takitigitillugu atatiinnarnissaanut aalajangiineq, Kangerlussuarmi innuttaasunut, takornariartitsisunut, aatsitassarsiortunut, silap pissusaanut ilisimatusartunut arlalitsigullu inuussutissarsiutinik ingerlatsisunut Kangerlussuarmi timmisartut nunanit assigiinngitsunit suli atorneqarsinnaanerata ilisimaneratigut aningaasaliisinnaanngoqqipput.
Takornariaqarnermut aningaasaliinerit
Ukiuni tulliuttuni aningaasaleerusussuseqarnerup annertuumik qaffakkiartornissaa ilimagaara, pingaartumik takornarialerinerup iluani. Kalaallit Nunaani hotelit angisuut akisoqisut sanaartorneqarput, sakkutooqarfiullu 1992-imi matuneqarneraniilli Kangerlussuup siunissaa nalorninartorsiutigineqarneratigut, nunarsuup sinneranit Kangerlussuarmi aningaasaliinissaq tunuarsimaarutigineqarnikuuvoq. Ukiut tallimakkaarlugit Kangerlussuaq matuniarneqartarpoq. Taamatut aserorsaataasumik pinnguarneq kiisami unitsinneqarsinnaalerpoq.
Kommunip pilersaarusiorfigineqarnerasigut Sermersuarmut aqqusineq sinerlugu hotelinut illuaqqanullu nunaminertanik, kiisalu Kangerlussuup eqqaani tammajuitsussarsititsiniarluni immikkoortuni unnuisarfinnik pilersitsinissamut kommunip suliniutaa kinguneqarsinnaalerpoq. Ukiuni kingullerni aningaasaleerusukkaluarlutik saaffiginnittartut, hotelinulli aningaasaliinissamut tunuarsimaarsimasut, piffissami tulliuttumi oqaloqatigeqqisinnaalernissaanut qilanaarpunga.
Qularutiginngilluinnarpara Kangerlussuarmut, Qeqqata Kommunianut Kalaallit
Nunaanullu iluaqutaassasoq.
Inuussutissarsiutinut aningaasaliineq
Kangerlussuullu nalaani inuussutissarsiutissatut periarfissarpassuit allat atorluarneqarsinnaalissasut naatsorsuutigaara. Biililiorfissuit piffissani sivikitsuni aaqqiissutinut Kangerlussuarmi aningaasaliisartut, ilisimaneqaatigisaminnik aningaasarpassuarnik atuisinnaalissapput, soorlu Kangerlussuarmi ingerlatsinissaminnut kissaatigisaraat.
Kangerlussuaq mittarfimmut aqqusineqartillugu kiisalu Sermersuarmut qanittuaniitillugu, silap pissusaanik qitiusumik ilisimatusarfittut, issittumi pingaarnertut silap pissusaanik ilisimatusarfiunissamut Svalbard-imut unammillersinnaalissaaq. Aalisarneq kisiat isumalluutigiunnaarlugu, ukiuni arlaqartuni inuussutissarsiornermut periarfissat nutaanik nassaarniarnissaq piviusunngorsinnaalerpoq. Ukiunullu tulliuttunut qilanaarpunga.
Attaveqaqatigiinnernut aningaasaliissutit
Kangerlussuup mittarfiata siunissaanik erseqqissaanikkut, attaveqaqatigiinnermut suliniutit attuumassuteqartut piviusunngortinneqarsinnaalissapput. Kangerlussuup Umiarsualivianik Inatsisartut sanaartulertariaqarput, taamaalilluta nunatut umiarsuarni takornariartaatini ilaasunik paarlaassisarnerup pingaaruteqaqisumik ineriartortitsisinnaalissaagut. Ilulissani, Nuummi Kangerlussuarmilu tamarmik immikkut iluaquteqarfiusunik siunissami pingasunik aaqqiissuteqarnikkut, Island-imut Canada-mullu unammillersinnaalissaagut. Umiarsuarmik takornariartaammik atuilluni issittumut angalaneq annertusigaluttuinnarpoq, Kallaallit Nunaanilu ineriartornermut annertunerusumik peqataaffigerusupparput.
Taamatuttaaq Naalakkersuisullu suleqatigiissitatta Kangerlussuarmut aqqusinersuup piviusunngortinnissaanut sulinerit piaartumik nangeqqittariqarpagut. Aqqusinersuummi piviusunngortinneratigut aningaasaliiumasut utaqqiinnarput, ilaatigut soorlu Aqqutikitsumi sisorartarfissualiorniartut.