Umiarsuit takornariartaatsit pingasut ataatsikkut talittarfiup avataani inissisimapput, angallatinik ikaartaatinik pramminillu pilersorneqarlutik. Umiarsuarnut takornariartaatinut kiisalu RAL-imit umiarsuarsuarnut pilersuutinut talittarfiup ikkappallaarnera patsisaalluni, taamatut ingerlatsisoqartariaqarpoq. Assaalluni angallatinut aqqutissiorfikkut angallatit ikaartaatit prammillu ingerlallutik nunamut ikaartariaqartarput, assatarli akulikinnerusumik sukkanerusumillu Sermersuarmit sioqqanik immertarpoq.
Umiarsuit takornariartaatit ilaasuminnik paarlaassisarnissaannut talittarfik nutaaq pingaaruteqarluinnarpoq
Borgmester Malik Berthelsen takuvaa, Kangerlussuarmi talittarfimmut nutaamut annertuumik periarfissaqartoq. Nunatut takornariaqarneq siuarsarniarutsigu, takornarissanut takornariartitsisartunullu periarfissiisariaqarpugut. Matumani Kangerlussuarmi talittarfittaarnissaq pingaaruteqarluinnarpoq.
Kalaallit Nunaanni sumiiffiit umiarsuarnik takornariartaatini ilaasunik paarlaaffissaat pitsaanerpaajunngitsut nassuerutigisariaqarparput. Kangerlussuaq kangerluup qinngortusup ukiumi sikusartup qinnguani inissisimavoq, illuatungaatigulli timmisartunit miffigiuminartuaannarluni. Miffigiuminassutsimut Nuummi unammilelrnartoqarpoq, umiarsualiveqarnikkulli pissutsit pitsaanerullutik. Sumiiffinni marluusuni pissutsit pitsanngorsaavigisariaqarpagut, taamaaliornikkut umiarsuit takornariartaatit periarfissanik namminneq toqqaasinnaalissapput. Periarfissat marluusut Island-imut imaluunniit Canada-mut tamarmik immikkut unammillersinnaanngillat, ataatsimoortinneratigulli uagut nunatut umiarsuit takornariartaatitigut takornariaqarneq ineriartortissinnaallutigu.
Namminersorlutik Oqartussat umiarsualiveqarnermut immikoortumut pilersaarutaani nr. 1
Namminersorlutik Oqartussat talittarfimmik sanaartornissamik aallartitsisimannginnera, Inuutissarsiutinut Takornariaqarnermullu ataatsimiititaliamut siulittaasumit Sofie-Dorthe-mit tupigusuutigineqarpoq. 2015-imili Namminersorlutik Oqartussat umiarsualiveqarnermut immikkoortumut pilersaarutaani pingaarnersiornermi, Kangerlussuarmi talittarfiliornissaq siullertut inissisimavoq. Kommunini allani mittarfissat nutaat inissinneqareerput, Namminersorlutik Oqartussallu Qeqqata Kommuniani atortulersuutitigut sanaartukkanut aningaasaliinissaanut piffissanngorpoq.
Kangerlussuarmi talittarfik nutaaq umiarsuarnut takornariartaatinut kisimi iluaqutaanavianngilaq. Maannakkut Namminersorlutik Oqartussanit ukiut pingasukkaarlugit sisamakkaarlugilluunniit aningaasaliiffigisartagaanut, talittarfimmit sioqqanik piiaasarnermut sipaarfiulissaaq. Tamatuma saniatigut RAL-imit assartuutit sukkanerusumik usingiaasalerneratigut usilersorneqartarneratigullu sipaaruteqarfiulissalluni. Assartuutit ullumikkutut ulluni arlalinni usingiaasarnerminnit, talittarfik nutaami ulloq ataaseq taamaallaat atorlugu talinngasarsinnaalissapput.
Inuussutissarsiutinik ineriartortitsinissamut periarfissat nutaat
Kangerlussuarmi nutaamik talittarfittaarnermi allanik periarfissaqalersitsisoq, borgmester Malik Berthelsen-imit takuneqarsinnaavoq. Kangerlussuarmi aqquserngit takisuujuneri, silap allangujaatsuunera, mittarfik pitsaasup kiisalu Sermersuarmi nillertarnera patsisaallutik, biilinik nioqqusiortut biilinik misileraavinnik pilersitserusupput. Biililli Kangerlussuarmut assartornissaanut talittarfik naapertuuttoq amigaatigivaat. Kangerlummi maannakkut inissisimaffianit 10 kilometerimit silarpasinnerusumut talittarfiup inissinneqarneratigut, tikiffigisarnera piffissaliussap illuttut sivisussusaa sapaatit akunnerinik marlunnik-pingasunik sivitsorneqarsinnaavoq.
Naggataagut minnerunngitsumilli, biilinik suliffissuaqarnermi periarfissanik nutaanik saqqummertoqartuaannarpoq, nuarsuarmi allamituulli atuilluartuunerusup tungaanut ingerlasumik. Kangerlussuarmi biilinik innaallagiatortunik sukkaniunnissamut nutaamut, EXTREME E-mi biilit atugassat imaatigut Kangerlussuarmut assartorneqassapput, pitsaanerusumillu talittarfeqannginnera tupigusuutigivaat. Tamanna tupigusuutigineqaqqissanngitsoq neriuutiginarpoq, Malik Berthelsen naggasiivoq.